Memleket basshysynyń tapsyrmasy boiynsha Elshi Dáýren Káripov strategiialyq yntymaqtastyq jónindegi Qazaqstan-German iskerlik keńesiniń (QGIK) burynǵy teń tóraǵasy, buǵan deiin «Deutsche Bank» AQ-nyń bas atqarýshy direktorynyń laýazymyn atqarǵan Peter Tilske 1-dárejeli «Dostyq» ordenin tabystady, dep habarlaidy "Ult aqparat" QR SIM baspasóz qyzmetine silteme jasap.
Marapattaý rásimi saltanatty túrde elimizdiń Berlindegi Elshiliginiń ǵimaratynda «Deutsche Bank» basqarma múshesi Iorg Bongartstyń, GFR SIM-niń «Ońtústik Kavkaz jáne Ortalyq Aziia» bóliminiń basshysy Anke Konradtyń, GFR Ekonomika jáne energetika federaldyq ministrliginiń syrtqy ekonomikalyq saiasat departamentiniń direktory Ekhard Frantstyń, «DB Engineering & Consulting» kompaniiasynyń bas direktory, biyl P.Tilstiń ornyna QGIK teń tóraǵasy laýazymyna taǵaiyndalǵan Niko Varbanofftyń, sondai-aq GFR-dyń basqa da qoǵamdyq-saiasi jáne isker top ókilderiniń qatysýymen ótti.
D.Káripov QR Prezidenti Qasym-Jomart Toqaevtyń atynan ekijaqty jemisti yntymaqtastyqty nyǵaitýǵa qosqan úlesi úshin P.Tilske joǵary memlekettik nagradany tabystai otyryp, «9 jyl boiy QGIK teń tóraǵasy laýazymyn atqarǵan Peter Tils ekonomikanyń túrli salalaryndaǵy birlesken jobalardy júzege asyrýǵa jan-jaqty qoldaý kórsetti, biznes ókilderi arasynda bailanys ornatty», – dep atap ótti.
Memleket basshylyǵyna osyndai joǵary nagrada úshin rizashylyǵyn bildirgen P.Tils Qazaqstan men Germaniia arasyndaǵy qatynastardy odan ary damytý men diversifikatsialaýdyń zor áleýetine toqtaldy.
Peter Tils tájiribeli bankir jáne qarjylyq qyzmetter basshylyǵynda 40 jyldyq eńbek ótili bar. 1977 jyldan bastap ol «Deutsche Bank AG» kompaniiasynda túrli joǵary laýazymdar atqardy, banktiń Eýropa jáne Ortalyq Amerika elderindegi aimaqtyq bólimshelerin basqardy. Joǵary deńgeidegi kásibiligi men eńbek tájiribesi arqasynda, 2007-2019 jyldar aralyǵynda Qazaqstan Prezidenti janyndaǵy sheteldik investorlar Keńesiniń múshesi boldy.
