Qazaqstanda neke tirkeý rásimi 1 aidan 3 kúnge qysqarady. Bul týraly búgin Úkimettiń selektorlyq rejimdegi otyrysynda QR Aqparat jáne kommýnikatsiialar ministri Dáýren Abaev aitty, dep habarlaidy "Ult aqparat".
Ministrdiń aitýynsha, kórsetiletin memlekettik qyzmetterdi elektrondy formatqa aýystyrý salasyndaǵy normativti-quqyqtyq bazany jetildirý úshin 43 zań men 10 kodekste 500 túzetýdi qarastyratyn zań jobasy ázirlengen.
«Atalǵan zań jobasy vedomstvoaralyq komissiianyń usynystary aiasynda kórsetiletin 121 memlekettik qyzmetti ońtailandyrýǵa baǵyttalǵan birqatar túzetýlerden turady. Birneshe mysal keltire keteiin. Birinshi - nekeni tirkeý qyzmetin ońtailandyrý arqyly buryn 1 aiǵa sozylǵan protsesti 3 jumys kúninde rásimdeýge múmkindik beriledi. Ekinshi - salyq tóleýshilerdiń artyq tólengen somasyn avtomatty túrde qaitarý qarastyrylady», - dedi Dáýren Abaev.
Úshinshiden, ministrdiń aitýynsha, kórsetiletin memlekettik qyzmetterdiń tártibin bir ǵana normativti akt - erejeler arqyly retteitin túzetýler de pysyqtalyp jatyr. Jalpy alǵanda 3,5 myń standart pen reglament ózgertýge joldanady.
«Sonymen qatar, túzetýlerdiń aiasynda «pilottyq joba» túsinigin engizý josparlanyp otyr. Osylaisha keibir kórsetiletin qyzmetterdi aldyn-ala qoldanyp kóremiz. Táýekeldi tustaryn anyqtap, halyqqa yńǵaily joldaryn qarastyryp, tańdap alamyz. Bul kórsetiletin memlekettik qyzmetterdi ońtailandyrý merzimin qysqartady. Qazirgi ýaqytta osyndai ózgertýler jarty jyldai ýaqytty alady. Sondai-aq, osy arqyly áleýmettik áseri bar máselelerge bailanysty táýekelderdi tómendetemiz. Óitkeni pilotty jobany qajetti ýaqytta toqtatýǵa jáne ózgertýge, azamattarǵa keri áser etpeýin qadaǵalaýǵa múmkindik beredi», - dedi ministr.
Onyń aitýynsha, atalǵan sharalardyń nátijesinde 2019 jyly kórsetiletin memlekettik qyzmetterdiń 80, al 2020 jyly 90 paiyzy avtomattandyrylady.
«Bir jylda qaǵaz túrinde usynylatyn 110 million qujat qysqarady. Eń bastysy kórsetiletin qyzmet túrleri halyqqa uǵynyqty, qoljetimdi jáne paidaly bolýy úshin bar kúsh-jigerimizdi, múmkindikterimizdi jumsaýǵa daiynbyz. Osy baǵyttaǵy jumystar bir sátke de toqtamaidy. Negizgi maqsat - el turǵyndarynyń saǵattap kezek kútpei, qajetti qujatyna jyldam ári ońai qol jetkizýine jaǵdai jasaý, Úkimet pen biznestiń, azamattardyń arasyndaǵy integratsiiany jańa deńgeige kóterý», - dedi ol.
