Elbasynyń tóraǵalyǵymen «Samuryq-Qazyna» ulttyq ál-aýqat qoryn basqarý jónindegi keńestiń otyrysy ótti, dep habarlaidy "Ult aqparat" elbasy.kz silteme jasap.
Jiynda «Samuryq-Qazyna» ulttyq ál-aýqat qory» aktsionerlik qoǵamy basqarmasynyń tóraǵasy A.Sátqaliev Qordyń biylǵy toǵyz aidaǵy qyzmetiniń qorytyndysy jáne negizgi strategiialyq maqsattary men damý basymdyqtary týraly baiandama jasady.
Otyrysqa qatysýshylar «Samuryq-Qazyna» ulttyq ál-aýqat qory» aktsionerlik qoǵamynyń 2022-2031 jyldarǵa arnalǵan damý strategiiasyn maquldady. Atalǵan qujatta Qazaqstan ekonomikasynyń naqty sektorynda infraqurylymdyq, eksportqa baǵdarlanǵan jáne importty almastyratyn jobalardy iske asyrýda investitsiiany ulǵaitý qarastyrylǵan.
Sondai-aq Keńes múshelerine «Samuryq-Qazyna» ulttyq ál-aýqat qory» aktsionerlik qoǵamynyń tómen kómirtekti damýǵa kóshý jónindegi tujyrymdamalyq tásilderi tanystyryldy. Osy turǵyda energetikalyq jáne ekologiialyq qaýipsizdik arasynda teńgerimdi saqtaý qajettigi aityldy.
Nursultan Nazarbaev «Samuryq-Qazyna» ulttyq ál-aýqat qory» aktsionerlik qoǵamy usynǵan 2060 jylǵa qarai kómirtegi beitaraptyǵyna qol jetkizý maqsattaryn qoldaitynyn bildirdi.
Sonymen qatar Elbasy energiia jetkizý tizbeginiń beriktigin nyǵaityp, jergilikti úlesti arttyrýdyń, ekonomikany ártaraptandyrýdyń, sonyń ishinde zamanaýi óndiris qalyptastyrý arqyly ishki naryqty taýarmen qamtý men eksport úlesin ulǵaitýdyń mańyzy zor ekenine toqtaldy.
«Samuryq-Qazyna» ulttyq ál-aýqat qorynyń sheteldik ozyq táýelsiz ál-aýqat qorlarymen yntymaqtastyǵy máselesine erekshe nazar aýdaryldy. Bul oraida Elbasy Birikken Arab Ámirlikterimen aradaǵy qarym-qatynas joǵary qarqynmen damyp kele jatqanyna toqtalyp, olardyń biregei tájiribesi men investitsiialyq múmkindigi Qazaqstan ekonomikasyn jańǵyrtý jolynda asa mańyzdy ekenin atap ótti.
«Halyqaralyq áriptestik aiasynda kúsh-jiger jumyldyrý «Samuryq-Qazyna» ulttyq ál-aýqat qory mejelegen jańǵyrýdy jedeldetip, ekonomikany tiimdi ártaraptandyrýǵa septigin tigizedi. Osylaisha jańa damý strategiiasyndaǵy maqsattardy iske asyrý Qordyń negizgi mindeti retinde qarastyrylyp otyr», – dedi Qazaqstannyń Tuńǵysh Prezidenti.
Otyrys barysynda «QazMunaiGaz» ulttyq kompaniiasy» aktsionerlik qoǵamy, «QazAtomÓnerkásip» ulttyq atom kompaniiasy» aktsionerlik qoǵamy jáne «Qazaqtelekom» aktsionerlik qoǵamy basshylarynyń qazirgi ahýal men taiaý jyldardaǵy damý boljamy týraly esebi tyńdaldy.
