Foto: © Sputnik / Vladislav Vodnev
Qylmystyq kodeksten Nursultan Nazarbaevqa til tigizgeni úshin jazaǵa tartatyn 373 jáne 374-baptar alynyp tastalýy múmkin, dep habarlaidy QazAqparat.
Parlament depýtattarynyń bastamasymen ázirlengen qujattyń jobasy Májilistiń resmi saitynda 23 mamyrdan beri tur. Qujattyń tolyq ataýy – «Qazaqstan Respýblikasynyń keibir zańnamalyq aktilerine zańsyz satyp alynǵan aktivterdi memleketke qaitarý máseleleri boiynsha ózgerister men tolyqtyrýlar engizý týraly» zań jobasy.
Májilis saityndaǵy salystyrmaly kestede Qylmystyq kodeksten Tuńǵysh Prezidentti kópshilik aldynda qorlaý jáne onyń abyroiy men qadir-qasietine nuqsan keltirý (sondai-aq onyń sýretin búldirý, onyń zańdy qyzmetine kedergi jasaý), Tuńǵysh Prezidentke qol suqpaýshylyq kepildigin joiý úshin qylmystyq jaýapkershilikti kózdeitin 373 jáne 374-baptardy alyp tastaý usynylǵanyn kórýge bolady.
Qazirgi ýaqytta zań jobasy QR Parlamenti Májilisinde qaralyp jatyr.
Ádilet ministrligindegiler zańnamaǵa osyndai ózgeris engizý usynylyp, Májilis qaraýynda jatqanyn rastady.
«Zań jobasy sheńberinde Qylmystyq kodeksten Tuńǵysh Prezidentti kópshilik aldynda qorlaý jáne onyń abyroiy men qadir-qasietine nuqsan keltirý (sondai-aq onyń sýretin búldirý, onyń zańdy qyzmetine kedergi jasaý), Tuńǵysh Prezidentke qol suqpaýshylyq kepildigin joiý úshin qylmystyq jaýapkershilikti kózdeitin 373 jáne 374-baptardy alyp tastaý josparlanýda.
Qazirgi ýaqytta zań jobasy QR Parlamenti Májilisinde qaralýda», - dep jazylǵan ministrliktiń baspasóz qyzmeti usynǵan málimette.
Aita keteiik, Qylmystyq kodekstiń qoldanystaǵy redaktsiiasynyń 373-babynda «Qazaqstan Respýblikasynyń Tuńǵysh Prezidenti – Elbasynyń ar-namysy men qadir-qasietine jariia túrde qorlaý jáne ózge de qol suǵý, Qazaqstan Respýblikasynyń Tuńǵysh Prezidenti – Elbasynyń beinelerin qorlaý, Qazaqstan Respýblikasynyń Tuńǵysh Prezidenti-Elbasynyń zańdy qyzmetine kedergi jasaý» áreketteri úshin eki myń ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna ne eki jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrý jazasy kózdelgen.
Al bul áreketter buqaralyq aqparat quraldaryn nemese telekommýnikatsiia jelilerin paidalaný arqyly jasalǵan bolsa, úsh myń ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna ne úsh jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrý jazasy kesiledi.
Sondai-aq, Nursultan Nazarbaevtyń ózi men onymen birge turatyn otbasy múshelerine onyń zańdy qyzmetine kedergi jasaý maqsatynda qandai da bir nysanda yqpal etý áreketi bes myń ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna ne bes jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrý jazasyna ákep soqtyrady.
Al 374-bap boiynsha Nursultan Nazarbaevtyń jáne onymen birge turatyn otbasy músheleriniń múlkine, turǵyn jáne qyzmettik úi-jailaryna, jeke jáne qyzmettik kólik quraldaryna qol suǵylmaýshylyq kepildikterin buzý, hat jazysýdyń, olar paidalanatyn bailanys quraldarynyń, bank qupiiasynyń jáne bank shottaryna qol suǵylmaýshylyq kepildikterin buzý áreketteri bes myń ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna ne bes jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrý jazasyna ákep soqtyrady.
