Parlament Májilisiniń jalpy otyrysynda depýtat Dariǵa Nazarbaeva Premer-Ministr Asqar Maminge tsifrlandyrý salasyndaǵy memlekettik saiasatty iske asyrý máselesi boiynsha saýal joldady, dep habarlaidy "Ult aqparat".
«2020 jyldyń nátijeleri boiynsha memleket Qazaqstan Respýblikasy halqynyń 98,7% internet jelisine keńjolaqty qoljetimdilikpen qamtamasyz etti. Bul sandardyń durystyǵyna sarapshylar da, halyq ta kúmán keltiredi. 510 aýyldyq eldi mekende Internettiń tómen jyldamdyǵy baiqalady. Sonymen qatar, Nur Otan partiiasynyń «Ózgerister joly: Ár azamatqa laiyqty ómir!» sailaýaldy baǵdarlamasyn iske asyrý boiynsha Jol kartasynyń 36-tarmaǵy aiasynda qalalyq jáne aýyldyq mektepterdiń bilim sapasyndaǵy alshaqtyǵyn azaitý úshin 2025 jylǵa qarai 100% kórsetkishke qol jetkize otyryp, 2021 jyly aýyl mektepteriniń 80% joǵary jyldamdyqty internetpen qamtamasyz etý qajettiligi atap ótildi», - dep toqtaldy Nazarbaeva.
Ol internettiń tómen jyldamdyǵynyń sebebi retinde Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligi aýyldyq eldi mekenderdi Internetpen qamtamasyz etý úshin qosymsha qosylýlardy paidalaný qajettigin aitty.
«Osyǵan bailanysty tiisti suraqtarǵa jaýap berýińizdi suraimyn. Aýyldyq eldi mekenderde internet jelisine qoljetimdilikti qamtamasyz etýdiń naqty tehnologiiasyn qoldaný týraly sheshim qalai qabyldanady jáne osy tehnologiialardyń aiyrmashylyǵy nede? Bailanys operatorlary aýyldyq eldi mekenderdegi «sońǵy milia» máselesin qalai sheshedi jáne sheshimniń qandai tásili neǵurlym tiimdi bolyp otyr? Qazirgi zamanǵy tehnologiialar engiziledi me jáne Tsifrlyq damý, innovatsiialar jáne aeroǵarysh ónerkásibi ministrligi nemese Qazaqstan Respýblikasynyń ózge de memlekettik organy «sońǵy miliany» qosýdyń qandai da bir túriniń maqsattylyǵyn aiqyndaýǵa qatysa ma? Aýyldyq eldi mekenderde internetke qosylý sapasyn turaqty negizde ólsheý júrgizile me jáne bul másele Qazaqstan Respýblikasynyń qandai memlekettik organynyń quzyretinde tur?», - dedi depýtat.
