Parlament Májilisiniń jalpy otyrysynda depýtat Dariǵa Nazarbaeva sheteldik investorlarmen jumys isteý tetikterin jetildirýge qatysty pikir bildirdi, dep habarlaidy "Ult aqparat".
«Sizdiń nazaryńyzdy sheteldik investorlarmen jumys isteý tetikterin jetildirý qajettiligi máselesine aýdarǵym keledi. Qazaqstan Respýblikasynyń sheteldik investorlarmen arbitrajdyq daýlary otandyq ekonomikaǵa investitsiialardy tartýdyń tejeýshi faktorlarynyń biri bolyp sanalady. Tórelik protsesterdiń kóp bóligi ashyq túrde jariia ótkiziledi, al materialdar internette kópshilikke qoljetimdi bolýy nátijesinde sheteldik BAQ-ta teris rezonans týyndaidy, bul el úshin bedel táýekelderiniń turaqty ósýine alyp keledi. Arbitrajdarmen jumys isteý úshin, onyń ishinde memlekettik organdardyń aralyq sot isin júrgizý orbitasyna qatysýyn barynsha azaitý úshin Bas prokýratýrada, Qarjy ministrliginiń Memlekettik kirister komitetinde jáne Ádilet ministrliginde mamandandyrylǵan bólimder qurylǵan. Investorlardyń quqyqtary men zańdy múddelerin qorǵaýǵa kómektesý úshin investitsiialyq ombýdsmen institýty quryldy», - dedi Nazarbaeva Premer-Ministr Asqar Maminniń atyna joldaǵan saýalynda.
Onyń aitýynsha, osyǵan qaramastan, Qazaqstan Respýblikasyna investorlardyń tórelik talap-aryzdarynyń sany udaiy ósip keledi. Bul daýlarda investorlar ózderiniń quqyqtary men múddelerin qazaqstandyq tarap buzady dep málimdei otyryp, halyqaralyq tórelikterge júginetin investitsiialyq daýlardyń úlesi basym.
«Árbir arbitrajdy daý qazaqstandyq sot jáne quqyq qorǵaý júieleri úshin «stress-test» bolyp otyrady. Arbitrajdar barysynda el ekonomikasynyń túrli salalaryndaǵy memlekettik basqarýdyń júieli kemshilikteri anyqtalady. Olardyń qataryna ýákiletti memlekettik organdardyń jumys baǵdarlamalary deńgeiinde investordyń mindettemelerin aiqyndaý tártibi jatady. Óitkeni memleket investitsiialardy barynsha kóp tartýǵa múddeli bolǵandyqtan, jaýapsyz investorlar osy jaǵdaidy paidalanady jáne úlestes kompaniialardan taýarlardy, jumystar men kórsetiletin qyzmetterdi joǵary quny boiynsha satyp alý arqyly investitsiialaý kólemin jasandy túrde ulǵaitýy múmkin», - dedi depýtat.
Onyń sózine qaraǵanda, tórelikke júgingen kezde jaýapsyz investorlar jumys baǵdarlamalarynda jazylǵan ózderiniń jalǵan investitsiialary úshin sotqa júginedi. Tórelik investordyń paidasyna sheshim shyǵarǵan jaǵdaida, jasandy kóterińki somalar elge boryshtyq aýyrtpalyq túsiredi, memleket aktivteri úshin ózge de teris táýekelder jasaidy.
«Baiandalǵannyń negizinde, investorlarmen jumysty uiymdastyrý kezinde shyǵyndardy jasandy arttyrýǵa jol bermeý maqsatynda investitsiialyq mindettemelerdi (jumys baǵdarlamalaryn) oryndaýdyń naqty jáne ashyq tetigin belgilep, ony baqylaýda ustaý usynylady. Osy máseleniń mańyzdylyǵyn jáne onyń investorlar úshin Qazaqstan Respýblikasynyń investitsiialyq tartymdylyǵyn qoldaý men saqtaý úshin mańyzyn eskere otyryp, osy másele boiynsha Úkimettiń ustanymyn usynýdy suraimyn», - dedi Nazarbaeva.
