Qazaqstan Respýblikasy Parlamenti Senatynyń Tóraǵasy Dariǵa Nazarbaeva Qazaqstanǵa resmi saparmen kelgen Ózbekstan Respýblikasy Olii Májilisi Senatynyń Tóraǵasy Tanzila Narbaevamen kezdesti. Bul jóninde Senattyń baspasóz qyzmeti habarlady.
Kezdesýde taraptar eki el arasyndaǵy yntymaqtastyqty keńeitýge erekshe mán beriletinin atap ótti.
Dariǵa Nazarbaeva óz sózinde Ózbekstan Qazaqstannyń Ortalyq Aziiadaǵy mańyzdy strategiialyq áriptesi ekenin atap ótti.
«Búginde Qazaqstan men Ózbekstan qarym-qatynastaryndaǵy barlyq salalarda damýdyń joǵary qarqyny kórinis taýyp otyr. Oǵan Qazaqstannyń Tuńǵysh Prezidenti – Elbasy N.Á.Nazarbaevtyń jáne Ózbekstan Prezidenti Sh.M.Mirzieevtiń sińirgen eńbegi zor», - dedi Senat Tóraǵasy.
Senat basshysy elimizdiń Prezidenti Q.K.Toqaev óziniń Memleket basshysy retinde shetelge barǵan ekinshi saparynda Ózbekstanda bolǵanyn atap ótti jáne ol ózara túsinistik pen tatý kórshilik turǵysyndaǵy qarym-qatynastardy odan ári nyǵaitý nietin pash etetinin aitty.
Qazaqstan Senatynyń Tóraǵasy Ózbekstannyń aimaqtaǵy basty saýda áriptesi ekenin atap ótti. 2018 jyly eki el arasyndaǵy taýar ainalymy 25 paiyzǵa ósip, 2,5 mlrd dollarǵa jetken bolatyn.
«Alǵa qoiǵan ortaq maqsatqa jetý úshin osy baǵyttaǵy jumysty jalǵastyra otyryp, ózara saýdany 5 mlrd dollar kólemine jetkizý kerek», - dedi joǵarǵy palata basshysy.
Dariǵa Nazarbaevanyń aitýynsha, eki eldiń investitsiia, energetika, týrizm, aimaqtyq jáne shekara mańyndaǵy yntymaqtastyq, tranzittik-kólik salalaryndaǵy ózara is-qimyldy odan ári tereńdetýdiń keleshegi zor.
Ózbekstan Olii Májilisi Senatynyń basshysy óz kezeginde Qazaqstan –Ózbekstannyń adal ári senimdi áriptesi ekenin jetkizdi.
«Bizdiń halyqtarymyzdy ortaq tarih jáne mádeni tamyrlastyq bailanystyrady. Damýdyń kóptegen salalary boiynsha uqsastyqtar bar. Ózbekstan Qazaqstanmen dostyq qarym-qatynasqa zor mańyz beredi», - dep atap ótti Tanzila Narbaeva.
Taraptar keiingi kezde Qazaqstan men Ózbekstannyń parlamentaralyq únqatysýlary qarqyndy bola túskenin, endi ony júieli túrde jalǵastyrý qajettigin aitty. Ol parlamentaralyq yntymaqtastyqtyń birlesken komissiiasyn qurý arqyly júzege asqany jón.
Talqylaý barysynda reformalardy quqyqtyq qamtamasyz etý jáne áleýmettik-ekonomikalyq damý salasynda tájiribe almasý baǵdarlamalaryn júzege asyrý, sondai-aq ekijaqty sharttar men kelisimderdi qabyldaý jáne ratifikatsiialaý protsesterin jedeldetý máseleleri qozǵaldy.
Kezdesý sońynda Qazaqstan Respýblikasy Parlamenti Senaty men Ózbekstan Respýblikasy Olii Májilisi Senaty arasyndaǵy 2019-2020 jyldarǵa arnalǵan yntymaqtastyqty damytý jónindegi birlesken Jol kartasyna qol qoiyldy.
