Nursultan Nazarbaev Joǵarǵy sot tóraǵasy Qairat Mámidi qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesýde Memleket basshysyna «100 naqty qadam» ult jospary aiasynda sot reformasyn iske asyrý jáne sot tóreligin atqarý jumystary jóninde esep berildi.
Elbasy sot júiesiniń jáne búkil quqyq qorǵaý salasynyń aldynda turǵan jumystardyń aýqymdy ekenin atap ótti.
– Azamattar sotqa senim artyp, kómek alý úshin júgingende, sheshim ádil bolyp, olardyń quqyqtary naqty qorǵalǵanda ǵana zańnyń tolyq ústemdigi qamtamasyz etiledi. Qazir olai deýge áli erte, – dedi Qazaqstan Prezidenti.
Memleket basshysy sot protsesinde jaryspalylyqtyń joqtyǵyna toqtalyp, advokatýranyń damýy álsiz ekenine nazar aýdardy.
– Sot júiesin jetildirý jónindegi barlyq sharalar keshendi túrde atqarylýǵa tiis. Jergilikti politsiia jumysyna syn aitylýda. Bizneske jáne salyqqa qatysty tekserýler sany azaimai otyr. Osy saladaǵy jumysty jónge keltirý kerek, – dedi Nursultan Nazarbaev.
Q.Mámi Memleket basshysyna quqyq qorǵaý salasynda júzege asyrylǵan reformalar sot júiesine oń áser etkenin baiandady.
– Respýblikada sottar turaqty rejimde jumys isteýde. Biyl 5 aidyń ishinde sottarǵa 512 myńnan astam qylmystyq, azamattyq jáne ákimshilik ister kelip tústi. Solardyń 417 myńnan astamy belgilengen protsessýaldyq merzimde qaraldy, – dedi Joǵarǵy sot tóraǵasy.
Budan bólek, Q.Mámi Qazaqstan Prezidentine azamattardyń sottarǵa shaǵymdanýy kóbeiip kele jatqany, sondai-aq elektrondyq sot júiesin engizý nátijeleri týraly baiandady.
Nursultan Nazarbaev kezdesý qorytyndysy boiynsha birqatar naqty tapsyrma berdi.
