Elbasynyń tóraǵalyǵymen eldiń áleýmettik-ekonomikalyq damý qorytyndylary jáne Jer reformasy jónindegi komissiianyń qyzmeti týraly keńes ótti, - dep habarlaidy "Ult aqparat" Aqordaǵa silteme jasap.
Keńeske premer-ministr Kárim Másimov, Prezident Ákimshiliginiń basshysy Ádilbek Jaqsybekov, premer-ministrdiń orynbasary - aýyl sharýashylyǵy ministri Asqar Myrzahmetov, Prezidenttiń kómekshisi - Qaýipsizdik keńesiniń hatshysy N.Ermekbaev, Ulttyq ekonomika ministri Qýandyq Bishimbaev qatysty.
Is-shara barysynda Jer reformasy jónindegi komissiianyń jumys qorytyndylary talqylanyp, jer zańnamasynyń ózgeristerine moratoriidi 5 jylǵa uzartý týraly sheshim qabyldandy.
"Jer kodeksiniń birqatar normalaryna moratorii engizilgen kezden bastap komissiia mańyzdy jumys júrgizdi, eldiń barlyq óńirinde keńes ótkizip, azamattardyń pikirin tyńdady. Jumys barysynda olar jaqsy usynystar aitty, atap aitqanda, jalǵa beretin telimderdiń shekti kólemin, jerdi paidalaný tásilderi men ony tiimsiz paidalanǵan jaǵdaida qabyldanatyn sharalardy anyqtaý týraly usynystar engizildi. Osylaisha, bári jerdi 49 jylǵa deiin jalǵa berý institýtyn saqtaý qajet degen ortaq sheshimge keldi. Sonymen birge, álemdik tájiribeni taǵy da zerttep, qosymsha ýaqyt qajet ekeni týraly turǵyndarǵa biliktilikpen túsindirý kerek. Sondyqtan Komissiianyń moratoriidi taǵy 5 jylǵa uzartý týraly usynysyn qabyldaimyn", – dedi Nursultan Nazarbaev.
Sondai-aq, Qazaqstan Prezidenti Úkimettiń jer zańnamasyna ózgerister engizý týraly sheshim qabyldaǵan kezde agroónerkásip salasyna qarajat tartý maqsatyn basshylyqqa alǵanyn atap ótti.
"Aýyldyq jerlerde halyqtyń shamamen 40 paiyzy turyp jatyr, 20 paiyzy aýylda eńbek etedi. Aýyl sharýashylyǵyn órkendetý kóptegen salalardyń damýyna septigin tigizedi. Aýyl sharýashylyǵymen ainalysatyndardyń barlyǵy bul salaǵa qoldaý kórsetý úshin memlekettiń qandai kúsh-jiger jumsaǵanyn jaqsy biledi. Jyl saiyn agrarlyq sektorǵa aitarlyqtai qarajat jumsalady, biraq ol ózin aqtai bermeidi. Naryqtyq ekonomikada olai bolmaidy. Munyń sebebi aýyl sharýashylyǵyndaǵy eńbek ónimdiliginiń tómendiginde jatyr, al ony arttyrý úshin qosymsha qarajat salý kerek. Búkil álem agrarlyq sektorǵa investitsiia tartý isimen ainalysýda. Bizdiń memleketimiz de aýyl sharýashylyǵyn damytý úshin kóbirek kapital tartýdy qalady. Eger bul jumys túsindirýden bastalyp, tek sodan soń ǵana zańdar qabyldansa, onda ahýal basqa bolar edi", - dedi Memleket basshysy.
Budan bólek, keńeste respýblikanyń áleýmettik-ekonomikalyq damýynyń negizgi máseleleri, memlekettik baǵdarlamalardyń oryndalý barysy jáne aldaǵy kezeńge arnalǵan josparlar qarastyryldy.
"Eldiń ekonomikalyq damýy álemde bolyp jatqan úderister saldarynan zor qysym kórip otyr. Qazirgi qarjylyq-ekonomikalyq daǵdarys, sandyq ekonomikanyń jańa paradigmasyna kóshý bizden múlde jańa qadamdar talap etedi. Biz sony taba bilýimiz kerek, bul úshin elde resýrstar jetkilikti", - dedi Nursultan Nazarbaev.
Óz baiandamasynda Myrzahmetov Memleket basshysynyń tapsyrmasymen qurylǵan komissiia Astanada, sondai-aq birqatar óńirde jurtshylyqtyń qatysýymen kóshpeli otyrys ótkizgenin aitty.
"Azamattardyń aryz-shaǵymdary úshin arnaýly sait ashylyp, call-ortalyqtar quryldy, búginde olarǵa 13 myńnan astam telefon qońyraýy túsken. Túsindirý jumystary barysynda jurtshylyqty barynsha keńirek qamtý úshin ákimdikter janyndaǵy qoǵamdyq keńester iske tartyldy, halyqtyń 67 myń ókilimen kezdesý ótti", - dedi premer-ministrdiń orynbasary - aýyl sharýashylyǵy ministri.
Myrzahmetov komissiianyń negizgi usynystary, sonyń ishinde aýyl sharýashylyǵy jerin jalǵa berý institýtyn saqtap, odan ári damytý, jalǵa beriletin jer telimderiniń shekti kólemin belgileý qajettigi jóninde de aitty. Sondai-aq halyqtyń jaiylymdar men shabyndyq jerlerge qatysty múddesi men talaptaryn eskerý kerektigi, jeke turǵyn úi salý úshin jer berýdiń naqty erejeleri men tetikterin anyqtaý qajettigi atalyp ótti.
Memleket basshysy keńes qorytyndysy boiynsha birqatar tapsyrma berdi.
Tolyǵyraq:https://kaz.tengrinews.kz/kazakhstan_news/jer-komissiyasyinyin-moratoriyd-tagyi-5-jyilga-uzartu-272056/
Materialdy kóshirip basqanda Kaz.tengrinews.kz saityna gipersilteme mindetti túrde qoiylýy tiis. Avtorlyq quqyqty saqtańyz.
.jpeg)