Memleket basshysy Nursultan Nazarbaev respýblikalyq telearnalar arqyly Qazaqstan halqyna arnalǵan málimdemesinde qazaqstandyqtarǵa Táýelsiz Qazaqstanymyzdy, ortaq Otanymyzdy, Máńgilik elimizdi saqtai bilýge shaqyrdy, dep habarlaidy QazAqparat tilshisi.
«Biz álemniń bir orynda turmai, únemi ózgerip jatqanyn kórip otyrmyz. Jańa múmkindiktermen qatar jahandyq jańa tehnologiialyq jáne demografiialyq syn-qaterler týyndap, álemdik tártip turaqsyzdana túsýde. Árbir urpaqtyń atqaratyn óz mindetteri bar. Men jáne meniń zamandastarym elimiz úshin qoldan kelgenniń bárin jasadyq. Onyń nátijeleri ózderińizge belgili. Álem ózgerip, jańa býyn keledi. Bul – tabiǵi protsess. Olar óz zamanynyń problemalaryn sheshetin bolady. Sondai-aq, elimizdi odan ári órkendetý úshin bar kúsh-jigerin jumyldyrýǵa tiis. Álemmen birge biz de ózgerýge tiispiz. Jas qazaqstandyqtarǵa aitarym: táýelsiz Qazaqstanymyzdy, ortaq Otanymyzdy, Máńgilik elimizdi saqtai bilińizder. Bul – bizdiń halqymyz, bizdiń uly babalarymyzdyń jeri. Otanymyz da, jerimiz de bir. Halqymyzdyń dostyǵy men birligin, bir-birimizge degen senimdi saqtap, elimizdegi árbir azamattyń tól mádenieti men dástúrin qurmettei bilińizder. Sonda ǵana biz myqty bolyp, syn-qaterdiń bárine tótep beremiz. Sonda ǵana biz órkendeitin bolamyz», - dedi Nursultan Nazarbaev.
