Nazarbaev Ýniversitetiniń ǵalymdary halal biologiialyq belsendi qospa ázirledi, dep habarlaidy "Ult aqparat" ýniversitettiń saityna silteme jasap.
«Nazarbaev Ýniversitetiniń National Laboratory Astana (NLA) Ómir týraly ǵylymdar ortalyǵynyń ǵalymdary qurǵaq bie súti (saýmal), ósimdik jáne metabiotikalyq komponentter negizinde jasalǵan jańa BBQ-ónim ázirledi. Jańa ónim «Saýmet» dep ataldy. Ol jańa 2019 jyl qarsańynda ashylǵan Qaraǵandy oblysy zaýytynyń jańa óndiristik jelisinde kapsýlalar túrinde shyǵarylady. Joba « Ǵylym qory» AQ qarjylyq qoldaýymen iske asyrylady», - delingen habarlamada.
Ǵalymdar antibiotikoterapiiadan keiin mikroflorany qalpyna keltirý úshin, sondai-aq ártúrli kúizelis faktorlar men syrtqy ortanyń jaǵymsyz áserleri bolǵan kezde «Saýmet» preparatyn qoldanýdy usynady. Budan basqa, ázirleýshiler «Saýmettiń» halal standarttaryna sáikes óndiriletinin atap kórsetedi.
«Dárilik nysandar men BBQ-qa arnalǵan kapsýlalardyń kóbi janýarlar jelatini negizinde jasalady. Biz óndiris kezinde tek ósimdik shikizatyn paidalanamyz. Osylaisha, biz tek qana halal nemese vegetarian tutynýshylardyń qalaýyn eskeremiz. Aldyn ala esepteýler boiynsha, preparattyń bir ailyq kýrsynyń quny 4 -7 myń teńgeni quraityn bolady. Preparattyń janama áseri joq», - dep habarlady «NLA» Ómir týraly ǵylym ortalyǵy, Adam mikrobiomy jáne uzaq ómir súrý zerthanasynyń aǵa ǵylymi qyzmetkeri Samat Qojahmetov.
«Saýmet» kapsýlalar biyl jyldyń ortasyna qarai satylymǵa túsedi dep kózdelip otyr. Ǵalymdar qazirdiń ózinde ósimdik syǵyndylarymen, polivitamindermen jáne t.b. baiytylǵan «Saýmet» negizinde jańa ónimder shyǵarýdy josparlap otyr.
