© Photo: Nazarbaev Ýniversitetiniń Facebook-taǵy resmi paraqshasynan
Nazarbaev ýniversitetiniń statýsy ózgermeidi. Bul týraly Ǵylym jáne joǵary bilim ministri Saiasat Nurbek málimdedi, dep habarlaidy Sputnik Qazaqstan.
Úkimette ótken brifingte jýrnalister Nazarbaev ýniversiteti erekshe mártebesinen aiyryla ma dep surady.
Ministr Nazarbaev ýniversitetiniń statýsy "Nazarbaev ýniversiteti", "Nazarbaev ziiatkerlik mektepteri" jáne "Nazarbaev qory" mártebesi týraly bólek zańmen aiqyndalǵanyn atap ótti.
"Birden aitaiyn, biz bul zańdy alyp tastamaimyz da, ózgertpeimiz de. Bizdiń mindetimiz – osy ýniversitettiń áleýetin saqtap qalý. Bul az ǵana tolyqqandy zertteý ýniversitetteriniń biri. Qazir ýniversitet tóńireginde oqý quny týraly óte kóp qaýeset tarap jatyr. Shyn máninde olardyń bári shyndyqqa janaspaitynyna sendirgim keledi. Bul – óte myqty zertteý ýniversiteti. Sondyqtan onyń mártebesine qatysty ózgeris bolmaidy", - dep jaýap berdi Saiasat Nurbek.
Ministr zańǵa ózgerister engizilgenin, qamqorshylyq keńesi jáne joǵary qamqorshylyq keńsi qurylǵanyn atap ótti. Aitýynsha, premer-ministr joǵary qamqorshylyq keńesin basqardy.
"Qazir qarjylyq saýyqtyrý, zertteý áleýetin kúsheitý boiynsha sharalar qabyldanady. Óitkeni keremet baza, infraqurylym, zerthanalar bar. Endi osyny tolyqqandy paidalaný qajet. Sol sebepti qandai da bir túzetý sharalary mindetti túrde bolady, biraq jalpy ýniversitettiń statýsy men baǵytyn ózgertpeimiz", - dedi Saiasat Nurbek.
