Qazaqstannyń Tuńǵysh Prezidenti – Elbasy Nursultan Nazarbaev Úkimet basshysy Asqar Maminmen kezdesti, - dep habarlaidy elbasy.kz.
Kezdesý barysynda Qazaqstannyń Tuńǵysh Prezidenti elimizde qabyldanǵan sharalardyń arqasynda koronavirýs infektsiiasynyń taralý qarqyny tómendegenin aityp ótti.
«Meditsina qyzmetkerleriniń kelisilgen jumysyn erekshe atap ótkim keledi. Qiyn jaǵdaida quqyq qorǵaý organdary da óz jumysynyń tiimdiligin kórsetýde. Úkimet pen jergilikti atqarýshy organdar da belsendi jumys istep jatyr», - dedi Nursultan Nazarbaev.
Elbasy Memleket basshysynyń tapsyrmalaryn sapaly oryndaýdyń mańyzdylyǵyn atap ótti.
«Prezidenttiń barlyq bastamasyn jergilikti halyqqa jetkizýdiń mańyzy zor. Men bul týraly oblys ákimderimen telefon arqyly sóilesken kezde de aittym», - dedi Qazaqstannyń Tuńǵysh Prezidenti.
Sonymen birge Nursultan Nazarbaev osy jaǵdaida ekonomikalyq qaýipsizdikti qamtamasyz etý qajettiligine nazar aýdardy.
«Álemdegi ekonomikalyq ahýal kúrdeli. Biraq birinshi toqsannyń qorytyndysy boiynsha bizdiń eldiń kórsetkishteri jaman emes. Alaida karantinniń áseri áli kúnge deiin eldiń ekonomikalyq kórsetkishterine tolyq áser etpegenin eskergen abzal. Shaǵyn jáne orta biznesti qoldaý jáne halyqty azyq-túlikpen qamtamasyz etý máseleleri mańyzdy bolyp qala beredi. Endi daǵdarystan keiingi kezeńde ne isteitinimizdi oilastyrýymyz kerek. Ekonomika quldyraidy. Onyń saldary 2008 jylǵy daǵdarystan keiingi kezeńge qaraǵanda anaǵurlym aýyr bolatyn sekildi», - dedi Elbasy.
Nursultan Nazarbaev Ulttyq qor men Úkimettiń rezervinen otandyq ekonomikany qoldaý úshin 10 milliard dollardyń ýaqtyly bólingenin jetkizdi.
Óz kezeginde Premer-Ministr Qazaqstannyń Tuńǵysh Prezidentine koronavirýs infektsiiasynyń taralýyn boldyrmaý jáne áleýmettik-ekonomikalyq turaqtylyqty qamtamasyz etý boiynsha qabyldanǵan sharalar týraly aqparat berdi.
Kezdesý sońynda Nursultan Nazarbaev ekonomikanyń shikizattyq emes sektorlaryn damytýǵa baǵyttalǵan baǵdarlamalardy iske asyrýdyń ózektiligine toqtaldy.
«Bizdiń elde budan da qiyn kúnder ótken. Biz bul qiyndyqtardy da jeńemiz. Eń bastysy - halqymyzdyń birligi men tynyshtyǵy. Úkimet tiimdi jumys isteidi dep sanaimyn. Erteń men Qazaqstan halqyna arnalǵan maqalamdy jariialaimyn. Qazir búkil álemge ońai tiip turǵan joq. Aýrýdyń shyrqaý sheginen áli ótpedik. Sondyqtan biz bir-birimizdi qurmettei otyryp, sabyr pen shydamdy tanytýymyz kerek», - dep túidi Elbasy.
