Nursultan Nazarbaev Qazaqstan halqy Assambleiasy Tóraǵasynyń orynbasary Janseiit Túimebaevty qabyldady, dep habarlaidy QazAparat saityna elbasy.kz silteme jasap.
Kezdesý barysynda Nursultan Nazarbaevqa Qazaqstan halqy Assambleiasynyń qazirgi qyzmeti men jumys josparlary jaily aqparat berildi.
Elbasy Qazaqstan halqy Assambleiasynyń barlyq múshelerine memlekettiń qalyptasýy men damýyna qosqan úlesi úshin alǵys aitty.
– Qazaqstan – polietnikalyq memleket. Bul tarihi qalyptasqan dúnie. Táýelsizdik alǵannan beri bizdiń kópultty halqymyz beibitshilik pen ózara túsinistikte ómir súrip, memleketimizdiń órkendeýine belsendi atsalysyp jatyr. Qazaqstan halqy Assambleiasy elimizdiń barlyq etnostaryn biriktiredi. Men Assambleiaǵa jáne búkil Qazaqstan halqyna osy jyldar ishinde saiasatymdy qoldaǵany jáne bizdiń elimizdi nyǵaitqany úshin óte rizamyn, – dedi Nursultan Nazarbaev.
Sonymen qatar, Qazaqstannyń Tuńǵysh Prezidenti óńirlerde QHA jumysynyń tiimdiligin arttyrýdyń mańyzdylyǵyn atap ótti.
– Men Qazaqstan halqy Assambleiasynyń tóraǵasy retinde jumysqa belsendi qatysýǵa, barlyq isterde Assambleiany qoldaýǵa jáne onyń jumysyn jergilikti jerlerde kúsheitýge niettimin. Qazaqstan halqy Assambleiasyna qoǵam ómirine belsendi túrde aralasýdy ári qarai jalǵastyrý mańyzdy, – dedi Elbasy.
Óz kezeginde J.Túimebaev eldegi ultaralyq kelisimdi nyǵaitý boiynsha is-sharalardyń oryndalý barysy jáne Qazaqstan halqy Assambleiasynyń gýmanitarlyq aktsiiasy aiasynda qabyldanǵan sharalar jóninde baiandady.
Sondai-aq, Elbasyna 2020 jyly Qazaqstan halqy Assambleiasynyń 25 jyldyǵyna daiyndyq barysy týraly málimet usynyldy.
Kezdesý sońynda Qazaqstan halqy Assambleiasynyń Tóraǵasy birqatar naqty tapsyrma berdi.
