Sapar barysynda Qazaqstannyń Tuńǵysh Prezidenti qalanyń rýhani-mádeni ortalyǵynda ótken kontsertke qatysyp, Túrkistan oblysynyń turǵyndarymen júzdesti, dep habarlaidy "Ult aqparat".
Óz sózinde Nursultan Nazarbaev oblys ortalyǵyn Túrkistan qalasyna kóshirý týraly sheshiminiń tarihi mańyzyna toqtaldy.
- Táýelsizdik alǵannan soń Túrkistandy astana retinde qarastyrdym. Biraq, ózderińiz biletindei, jaǵdai buǵan jol bermedi. Búgin bul qala oblys ortalyǵyna ainaldy, shahardy jandandyrý jumystary júrgizilýde. Túrkistan - túrki áleminiń besigi. Baýyrlas túrki memleketteri de bizge kómektesedi dep senemin, - dedi Elbasy.
Odan bólek, Qazaqstannyń Tuńǵysh Prezidenti búkil qala boiynsha júrip jatqan qurylys qarqynynyń joǵary ekenin atap ótti.
- Birinshi kezeńde 175 nysannyń qurylysy josparlanǵan. Onyń 102-ci biyl iske qosylady. Jumystyń qandai qarqynmen atqarylyp jatqanyn kórip otyrsyzdar. Bul úshin men osy jerde barlyq oblystardyń basyn qostym. Qolynan is keletin azamattar óz sharýasyn dóńgeletip áketip jatyr. Bolashaqta ádemi qala bolady, halyq sany ósedi. Qazir qala turǵyndarynyń sany 170 myń bolsa, menińshe az ýaqyttyń ishinde jarty millionǵa jetedi, - dedi Nursultan Nazarbaev.
Elbasy sonymen qatar oblys ortalyǵynyń áleýmettik-ekonomikalyq jaǵdaiy da jaqsaryp, jumys oryndary kóptep ashylatynyn sóz etti.
«Túrkistannyń ornalasqan jeri - toǵyz joldyń toraby. Qytaidan biz arqyly Evropaǵa ótetin dáliz bar. Temir jol bar. Sondyqtan táýelsiz Qazaqstanymyzda taǵy bir keremet ortalyq, tarihi qala boi kóterip otyr. Bul - bárimizdiń qýanyshymyz. Endigi jyly kóp ǵimarattar iske qosylyp, jańa nysandar salynyp, osy jerde taǵy kezdesemiz», - dedi Nazarbaev.
Sóz sońynda Elbasy oblys ortalyǵynyń qurylysy men jandanýyna at salysyp jatqan barsha jurtqa alǵysyn bildirdi.
- Keseneni jóndeýden ótkizdik, ózderińiz bilesizder. Qoja Ahmet Iasaýi atyndaǵy ýniversitet ashyldy. Kóp sharýalar óz retimen jasalyp jatyr. Munyń barlyǵynyń sońǵy mindeti - oblys ortalyǵyn salý edi. Oǵan da, minekei, kýá bolyp otyrmyz. Sondyqtan barshańyzdy osyndai bastamamen quttyqtaimyn!Túrkistan úlken qalaǵa ainalyp, jan-jaqtan týrister keletin bolady. Biyldyń ózinde bir millionnan astam týrist kelipti. Al, myna ǵimarattar salynǵannan keiin tarihi, mádeni ortalyq qalyptasyp, týrister qarasy odan saiyn kóbeiedi. Demek túrkistandyqtar jumyssyz qalmaidy. Myna salynyp jatqan ǵimarattarda, qonaqúilerde qanshama túrkistandyqtar jumys isteitin bolady. Barlyǵy osy shahardan nápaqasyn taýyp, halyqtyń ál-aýqaty jaqsarady. Qazaqstanymyz jasai bersin, Túrkistan jasai bersin, - dep túiindedi Qazaqstannyń Tuńǵysh Prezidenti.
Kontsert sońynda Nursultan Nazarbaev qolónershilerdiń kórmesin aralap kórdi. Onda álemniń 20 elinen kelgen sheberlerdiń jumystary usynylǵan.
