Almatyda «Jahandaný dáýirindegi tsifrlyq kún tártibi» halyqaralyq forýmynyń jumysy bastaldy, dep habarlaidy QazAqparat tilshisi.
QR Prezidenti Nursultan Nazarbaevtyń forým qatysýshylaryna joldaǵan hatyn Úkimet basshysy Baqytjan Saǵyntaev jetkizdi.
«Álem qazir túbegeili ózgerister zamynynda. Tsifrlandyrý - ulttyq ekonomikanyń qozǵaýshy kúshi. Álemdik uiymdar osy tsifrlandyrýǵa mán berip otyr. EAEO da 2025 jylǵa deiin tsifrlandyrýǵa mán berip otyr. Búgingi forým - kún tártibindegi máseleni júzege asyrýǵa jasalǵan mańyzdy qadam. Tsifrlandyrýdy júzege asyrýda qandai qadam jasaityn bolamyz, sony birigip talqylaimyz. Bul shara qajetti sheshimder qabyldaýǵa múmkindik beredi», - delingen Nursultan Nazarbaevtyń hatynda.
Forým jumysyna Armeniia, Belarýs, Qazaqstan, Qyrǵyzstan, Resei, Ózbekstan jáne Tájikstannyń Premer-Ministrleri, sondai-aq halyqaralyq birqatar IT kompaniialardyń ókilderi qatysyp otyr.
Elimiz «Tsifrlyq Qazaqstan» baǵdarlamasyna barlyǵy 169 mrld teńge jumsaýdy kózdep otyr. Boljam boiynsha baǵdarlama arqasynda 2025 jyldan bastap, IJÓ-niń 30 paiyzy tsifrlandyrý jobalarynan turýy kerek. Sondai-aq, «Tsifrlyq Qazaqstan» memlekettik baǵdarlamasyna salynǵan qarjy 2025 jylǵa qarai 4,8-6,4 ese investitsiia esebinde qaitady degen jospar bar.
Aita keteiik, forým Qazaqstan Prezidenti Nursultan Nazarbaevtyń bastamasymen uiymdastyrylyp otyr. Naqtyraq aitqanda, 2017 jyldyń qazan aiynda Joǵarǵy Eýraziialyq ekonomikalyq keńestiń otyrysynda EAEO-ǵa qatysýshy memleketter basshylary tsifrlyq jumys kún tártibiniń 2025 jylǵa deiingi basty baǵyttaryn bekitken. Sondai-aq, Prezident Nursultan Nazarbaevtyń EAEO ekonomikasyn tsifrlandyrý boiynsha arnaiy kezdesý ótkizý týraly bastamasyna qoldaý tanytqan bolatyn.
Jalpy, Qazaqstan TMD ishinde alǵashqy bolyp, elektrondyq tsifrlyq qoltańbany qoldanýdy, elektrondyq úkimet biryńǵai portalynda elektrondyq memlekettik qyzmetterdi engizýdi bastaǵan. «Tsifrlyq Qazaqstan» ekonomikasyn jedel tehnologiialyq jańǵyrtýdy qamtamasyz etý baǵytynda tsifrlyq transformatsiialaý boiynsha keshendi baǵdarlama qabyldandy. Baǵdarlamada 2 negizgi maqsat aiqyndalǵan. Birinshi, ekonomika salalaryn tsifrlandyrý, tsifrlyq memleketke ótý jáne «Tsifrlyq Jibek jolyn» damytý arqyly ekonomikany damytý jáne halyqtyń turmys sapasyn jaqsartý qarqynyn aitarlyqtai údetý. Ekinshi, adam kapitalyn damytý jáne uzaq merzimdi perspektivada innovatsiialyq ekojúieni qurý arqyly Qazaqstan ekonomikasynyń jańa damý traektoriiasyna ótý mindeti tur.
