Nursultan Nazarbaev TMD-nyń birqatar eliniń dinbasylarymen – islam dini ókilderimen kezdesý ótkizdi, dep habarlaidy "Ult aqparat" Elbasynyń resmi saityna silteme jasap.
Qazaqstannyń Tuńǵysh Prezidenti Ózbekstan musylmandary dini basqarmasynyń tóraǵasy Nuriddin Haliknazarovpen, Qyrǵyzstan musylmandary dini basqarmasynyń tóraǵasy Zamir Rakievpen, Resei Federatsiiasy musylmandary dini basqarmasy tóraǵasynyń birinshi orynbasary Damir Mýhetdinovpen ótken kezdesý barysynda olarǵa astanadaǵy jańa meshittiń ashylýy rásimine qatysýǵa ýaqyt bólip, arnaiy kelgenderi úshin rizashylyq bildirip, alǵysyn aitty.
Nursultan Nazarbaev dinniń Qazaqstan halqy ómirinde airyqsha oryn alatynyn atap ótip, elimizde konfessiialar arasyndaǵy dialog máselesine udaiy basa kóńil aýdarylyp kele jatqanyn jetkizdi. Qazaqstannyń Tuńǵysh Prezidenti jańa meshittiń islamdaǵy tatýlyq pen toleranttylyq ideiasynyń myzǵymas mánin aishyqtap turǵanyn, onyń esigi barlyq din men ulttyń ókilderi úshin árdaiym ashyq bolatynyna toqtalyp ótti.
Óz kezeginde qonaqtar da Qazaqstannyń astanasyna degen súisinisterin jasyrmai, jańa meshit rýhani ortalyq qana emes, qalanyń asa kórnekti ornynyń taǵy birine ainalatyny jóninde pikir bildirdi.
