Elbasy «Atameken» ulttyq kásipkerler palatasy prezidiýmynyń tóraǵasy Timýr Qulybaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysyna «Atameken» ulttyq kásipkerler palatasynyń qazirgi qyzmeti jóninde málimet berildi.
Nursultan Nazarbaev shaǵyn jáne orta biznesti qoldaýdyń mańyzdylyǵyna toqtalyp, bul baǵyt boiynsha memleket qabyldaǵan sharalardyń nátijelerin atap ótti.
- Sońǵy kezde biz quqyq qorǵaý organdary arqyly da, jergilikti organdar arqyly da shaǵyn jáne orta biznesti qoldaýǵa arnalǵan kóptegen mańyzdy sheshimder qabyldadyq. Munyń ishinde shaǵyn nesie berý máselesi de, jurtty bizneske úiretý máselesi de bar, – dedi Qazaqstan Prezidenti.
Memleket basshysy «Atameken» ulttyq kásipkerler palatasynyń aimaqtardaǵy is-qimylymen, onyń ishinde jurtshylyqqa biznes júrgizý negizderin úiretý salasyndaǵy jumystarymen tanysty.
- Biz ótken jyly «Bastaý» baǵdarlamasyn bastadyq. Bul – 30 kún ishinde aldyn-ala irikteý ótkizip, jurtqa biznestiń álippesin uǵynýǵa múmkindik beretin ailyq oqý kýrsy. Ákimdiktermen birlesip, shaǵyn qarjy uiymdaryn quryp, bitirýshilerdi qarjylandyrdyq. Biz bul baǵdarlamany Úkimetke usyndyq jáne qoldaýǵa ie boldyq. Biylǵy jyly 1 milliard 200 million teńge bólindi. Baǵdarlama aiasynda elimizdiń 80 aýdanynda jumys júrgizip, 15 myń adamdy oqytatyn bolamyz, – dedi T.Qulybaev.
