Elbasy Nursultan Nazarbaev partiia múshelerin "ún-túnsiz otyrǵany" úshin synǵa aldy, dep habarlaidy Sputnik Qazaqstan.
Nur Otan partiiasy Saiasi keńesiniń keńeitilgen otyrysynda belsendi azamattardy jumysqa tartý máselesin kóterdi. Onyń aitýynsha, partiiaǵa óte belsendi azamattar, qarapaiym halyqpen jumys isteitin adamdar kerek. Osy oraida Nazarbaev Shymkentte bolǵan oqiǵany eske aldy.
"Shymkentte partiianyń týyn julyp tastady. Bul oqiǵa ortalyq keńseniń aldynda boldy. Bireýi de lám-mim degen joq. Partiia qaida qarady? Artynan bárin ornyna keltirýge týra keldi. Mine, bári osyndaida baiqalady. Partiia, "Nur Otan" deimiz. Biraq typ-tynysh otyramyz. Bir nárseden qorqamyz ba?", - dedi Nazarbaev.
Aita keteiik, biyl maýsym aiynda Shymkentte Arys turǵyndary miting jasap, qala kóshelerimen júrip ótti. Sodan keiin Nur Otan partiiasynyń keńsesine baryp, bilik ókilderimen kezdesýdi talap etti. Sol kezde bir jas jigit tuǵyrǵa minip, partiianyń týyn julyp tastamaq boldy.
