Qazaqstannyń Tuńǵysh Prezidenti Nursultan Nazarbaev Shot-Aman Ýálihanovtyń qaitys bolýyna bailanysty otbasy men týǵan-týystaryna kóńil aitý jedelhatyn joldady, - dep habarlaidy Tengrinews.kz tilshisi Elbasy.kz saityna silteme jasap.
Nursultan Nazarbaev kórnekti sáýletshi, qoǵam qairatkeri, Memlekettik syilyqtyń laýreaty, egemen elimizdiń eltańbasy avtorynyń biri Shot-Aman Ýálihanovtyń ómirden ótkeni týraly sýyt habardy úlken kúizelispen qabyldap, orny tolmas aýyr qaiǵyǵa ortaqtasyp, kóńil aitty.
"Shot-Aman Ydyrysuly san qyrly daryny men biik parasaty, eseli eńbegi arqyly ulttyq sáýlet óneriniń órkendeýine zor úles qosqan tulǵa edi. Azattyqtyń besigi bolǵan Almaty qalasyndaǵy Táýelsizdik monýmentin somdaǵan shyǵarmashylyq top jetekshisi, sondai-aq kóptegen eńseli eskertkishter men kórikti ǵimarattardyń avtory retinde el mádenietiniń damýyna atsalysty. Talantty shákirtter tárbielep, sońyna birqatar ǵylymi-zertteý eńbekterin qaldyrdy.
Alash jurtynyń qurmetine bólengen abzal azamattyń jarqyn beinesi halyq jadynda árdaiym saqtalady dep senemin", - delingen jedelhatta.
