Memleket basshysy Nursultan Nazarbaev Saýd Arabiiasy Koroldiginiń Ishki ister ministri Ábdel Áziz ben Saýd ben Naifpen kezdesti, dep habarlaidy Aqordanyń baspasóz qyzmeti.
Kezdesý barysynda taraptar Qazaqstan men Saýd Arabiiasy arasyndaǵy yntymaqtastyqty keńeitý máselelerin talqylady.
Qazaqstan Prezidenti eki el arasyndaǵy qarym-qatynasty nyǵaitýǵa Ábdel Áziz ben Saýd ben Naiftiń zor úles qosqanyn atap ótti.
- Saýd Arabiiasy - islam álemindegi bizdiń mańyzdy ári senimdi seriktesimiz. Biz eki memleket arasyndaǵy saiasi jáne ekonomikalyq bailanystardy odan ári tereńdetýge niettimiz. Sondyqtan men Saýd Arabiiasynyń Koroli Salmandy jáne Taq muragerin Qazaqstanǵa shaqyrdym, - dedi Nursultan Nazarbaev.
Saýd Arabiiasy Koroldiginiń Ishki ister ministri kezdesýge múmkindik alǵany úshin Memleket basshysyna rizashylyq bildirip, Qazaqstanǵa Saýd Arabiiasynyń joǵary basshylyǵynyń tapsyrmasy boiynsha kelgenin aitty.
