Nursultan Nazarbaev «Úlken Eýraziia: Dialog. Senim. Seriktestik» taqyrybynda Eýraziia elderi parlamentteri spikerleriniń IV keńesiniń ashylýyna qatysty, dep habarlaidy "Ult aqparat" elbasy.kz saityna silteme jasap.
Eýraziia elderi parlamentariileri basqosýynda Qazaqstannyń Tuńǵysh Prezidenti búkil qurlyqta parlamentaralyq dialog pen yntymaqtastyq ornatýdyń mańyzdylyǵyn atap ótti.
Elbasy táýelsizdik jyldaryndaǵy elimizdiń negizgi damý basymdyqtary týraly aityp berdi.
– Biz ekonomikalyq progress pen halyqtyń ál-aýqatyn jaqsartýǵa negizgi basymdyq berdik. Naryqtyq ekonomikany jańadan qurǵan Qazaqstan búginde álemdegi eń damyǵan 50 eldiń qataryna qosyldy. Qazaqstannyń JIÓ 18 ese ósti. El ekonomikasynyń kólemi Ortalyq Aziia elderiniń jalpy ishki óniminiń deńgeiinen 2 ese joǵary. Halyqtyń tabysy dollarmen eseptegende 9 ese ósti, kedeilik deńgeii 10 ese, 40-tan 4,6%-ǵa deiin tómendedi, - dedi Nazarbaev.
Sonymen qatar, Qazaqstannyń Tuńǵysh Prezidenti elimizdiń tranzittik-kóliktik áleýetin damytý jáne qolaily biznes ahýal qalyptastyrý salasyndaǵy jetistikterin atap ótti.
Sondai-aq, Nursultan Nazarbaev Qazaqstannyń halyqaralyq-quqyqtyq moiyndalýy jónindegi jumystardyń nátijelerine toqtaldy.
Elbasy elimizdiń iadrolyq qarýsyzdaný jáne jappai qyryp-joiatyn qarýdyń taralýyna qarsy baǵyttalǵan sharalary týraly aitty.
– Qazaqstan BUU Bas Assambleiasy qabyldaǵan iadrolyq qarýdan azat álem qurý týraly deklaratsiianyń bastamashysy jáne teń avtory boldy. Óńirdegi kórshilerimizben birge biz Ortalyq Aziiada iadrolyq qarýdan azat aimaq qurdyq. Men «Iadrolyq qarýsyz álem jáne jahandyq qaýipsizdik úshin» nagradasyn taǵaiyndadym, - dedi Qazaqstannyń Tuńǵysh Prezidenti.
Nursultan Nazarbaev belsendi, kópvektorly jáne beibitshil saiasattyń arqasynda Qazaqstan óziniń egemendigi men ulttyq qaýipsizdigin edáýir nyǵaitqanyn atap ótti.
– Halqymyzdyń ulttyq biregeiligi men mádenietin saqtaý mańyzdy basymdyq retinde aiqyndaldy. Uly dala álemge jylqy sharýashylyǵy men atqa miný mádenietin, ejelgi metallýrgiiany, «ań stilin» jáne «Altyn adam» dep atalatyn – saq jaýyngeriniń kiimderin berdi. Biz qazir qalpyna keltirip jatqan Uly Jibek jolynyń kerýenderi Qazaqstannyń baitaq dalasynan ótti. Túrki álemi osy jerde dúniege keldi, - dedi Elbasy.
Qazaqstannyń Tuńǵysh Prezidenti qurlyq elderi arasyndaǵy eýraziialyq diologty, senim men seriktestikti nyǵaitý boiynsha birqatar usynystar aitty.
Nursultan Nazarbaev parlamentariilerdi álemniń jetekshi derjavalary arasyndaǵy jahandyq senim daǵdarysyn sheshý úderisine belsendi qatysýǵa shaqyrdy.
– Biz halyqaralyq quqyq júiesiniń tyǵyryqqa tirelgenin, onyń elenbei, eskerilmei buzylyp otyrǵanyn kórip otyrmyz. Memleketterdiń egemendigi men aýmaqtyq tutastyǵy jáne buryn qol jetkizilgen kelisimder buzylǵan jaǵdailar barshaǵa belgili. Sanktsiialardy óz erkimen qoldaný ony qarsy baǵyttaǵan elderge ǵana emes, sonymen birge barlyq basqa memleketterge de, álemdegi milliondaǵan qarapaiym adamdardyń ál-aýqatyna keri áserin tigizedi, - dedi Elbasy.
Sonymen qatar, Qazaqstannyń Tuńǵysh Prezidenti álemdik qaýymdastyq úshin mańyzdy halyqaralyq sharttardy ratifikatsiialaý jumysyn jandandyrý qajettigin atap ótti.
– Parlamentaralyq qaýymdastyqty ortaq múddege jumyldyryp, zań shyǵarý baǵytyndaǵy birlesken jumystyń tiimdiligin arttyrý kerek. Quqyqtyq aktilerdi úilestirý jolynda da kóp jumys atqarylýy tiis. Mysaly, terrorizmniń jalpyǵa ortaq anyqtamasyn aiqyndaý, terroristik jáne ekstremistik uiymdardyń, uiymdasqan halyqaralyq qylmystyq toptardyń biryńǵai tizimin qurý mańyzdy, - dedi Nursultan Nazarbaev.
Sóz sońynda Elbasy IV keńestiń Úlken Eýraziiany odan ári damytý joldaryn aiqyndaýdaǵy mańyzdylyǵyn taǵy bir atap ótti.
