Qazaqstannyń Tuńǵysh Prezidenti Nursultan Nazarbaev pen Resei Prezidenti Vladimir Pýtin kezdesti. Bul týraly Elbasynyń baspasóz hatshysy Aidos Úkibai Tvitterde jazdy.
«Nursultan Nazarbaev pen Vladimir Pýtinniń «tet-a-tet» formattaǵy kezdesýi bastaldy. Kelissóz boiynsha tolyǵyraq aqparat Elbasy.kz saitynda jariialanady», - delingen habarlamada.
Sankt-Peterbýrgke Qazaqstan Prezidenti Qasym-Jomart Toqaev ta barǵan bolatyn.
Kezdesý barysynda TMD elderiniń kóshbasshylary Dostastyq sheńberindegi birlesken jumys qorytyndylaryn, kópjaqty ózara is-qimyldy damytý jáne Uiym qyzmetiniń tiimdiligin arttyrý perspektivalaryn talqylaidy dep josparlanǵan. Sondai-aq, halyqaralyq jáne óńirlik kún tártibindegi ózekti máseleler de sóz bolady.
TMD-ǵa múshe memleket basshylarynyń beiresmi sammiti búgin, 28 jeltoqsanda Sankt-Peterbýrgte ótedi. Kreml saitynda beiresmi kezdesýdiń bastamashysy Resei prezidenti Vladimir Pýtin bolǵany jazylǵan.
