Joǵary Eýraziialyq ekonomikalyq keńestiń qurmetti tóraǵasy Nursultan Nazarbaev pen Qazaqstan Prezidenti Qasym-Jomart Toqaev videokonferentsiia rejiminde JEEK otyrysyna qatysyp jatyr, dep habarlaidy QazAqparat.
«Biylǵy jyl jaǵymsyz jailarǵa toly boldy. Pandemiia men ekonomikalyq daǵdarystyń saldary aiqyn baiqaldy. Belarýstegi sailaýdyń kúrdeli jaǵdaidy ótýi, Armeniiada bolǵan oqiǵalar – osynyń bárin kórip-bilip, ýaiymdap otyrdyq. Munyń bári de artta qaldy degen úmittemiz. Pandemiianyń ózi daǵdarys ýaqytyndaǵy memlekettiń mańyzdy rólin kórsetip berdi. Memlekettik retteýdiń shuǵyl sharalarynyń arqasynda biz pandemiianyń jaǵymsyz saldarynan, ekonomikalyq belsendiliktiń quldyraýynan, adam kapitalyn joǵaltý qaýpinen ainalyp óttik. Tek memlekettik qoldaý ǵana ishki naryqtaǵy turaqtylyqty qamtamasyz etti», - dedi Nursultan Nazarbaev otyrysta.
Elbasy ekonomikalyq odaqqa múshe memleketteriniń kooperatsiiasynyń deńgeii joǵarylyǵy baiqalǵanyn, pandemiiamen kúres aiasynda memleketter bir-birine gýmanitarlyq kómek jibergenin jetkizdi.
«EAEO aýmaǵynda koronavirýs infektsiiasynyń odan ary taralýyna jol bermeý maqsatynda birlesken sharalar jospary ázirlendi. Osy rette óz odaqtastaryna árdaiym kómek kórsetip kele jatqan Reseidiń rólin erekshe atap ótkim keledi. Bul kómek pandemiia ýaqytynda erekshe baiqaldy. Pandemiia kezinde biz iyqtasyp turyp bir-birimizge kómektestik. Resei osy elderdiń ishinde birinshi bolyp koronavirýsqa qarsy vaktsina ázirlep, ekonomikalyq odaqtaǵy memleketterge usyndy. Onymen qosa EAEO elderi protektsionistik dúrbeleńge jol bermedi, bir-birine ekonomikalyq turǵyda teris áreket etken joq. Bul – bizdiń integratsiia baǵytyndaǵy baǵdarymyz durys ekenin kórsetedi», - dedi Nursultan Nazarbaev.
