Nursultan Nazarbaev «Nur Otan» partiiasy Tóraǵasynyń birinshi orynbasary Baýyrjan Baibekti qabyldady. Bul týraly QR Tuńǵysh Prezidentiniń baspasóz qyzmetinen málim etti, dep habarlaidy "Ult aqparat".
Kezdesýde Elbasyǵa partiiany jańǵyrtý josparyn júzege asyrý barysy, sondai-aq «Nur Otan» partiiasynyń Túrkistan oblysy Arys qalasyn qalpyna keltirý jumystaryna atsalysýy týraly baiandaldy.
«Nur Otan» – elimizdegi basty saiasi kúsh. Partiia halyqqa jaqyn bolyp, onyń muń-muqtajyn bilýge jáne oǵan qoldaý bildirýge tiis. Qoǵamda týyndaityn máselelerdi sheshýge kómektesý kerek. Sondai-aq, partiiamyzdyń kadrlyq quramyn muqiiat zertteý qajet. «Nur Otan» óz jumysyn odan ári jetildirýdi jalǵastyra berýge tiis», – dedi Nursultan Nazarbaev.
Elbasy «Nur Otan» partiiasynyń óńirlerdegi filialdary men bastaýysh partiia uiymdarynyń jumysyn jandandyrýdyń mańyzdylyǵyn atap ótti.
«Bastaýysh partiia uiymdarynyń jetekshilerimen, Saiasi keńes múshelerimen, partiianyń óńirlerdegi filialdarynyń basshylarymen kezdesý josparlanǵan. Uiymnyń barlyq býynynyń oidaǵydai jumys isteýin qamtamasyz etýdiń mańyzy zor. Sondai-aq, partiianyń Májilistegi jáne máslihattardaǵy fraktsiialary tarapynan Úkimet pen ákimderdiń jumysyn baqylaýdy barynsha kúsheitý qajet», – dedi Qazaqstannyń Tuńǵysh Prezidenti.
Nursultan Nazarbaev partiialyq baqylaý komissiialarynyń jáne ortalyq pen jergilikti jerlerdegi sybailas jemqorlyqqa qarsy is-qimyl keńesteriniń jumysyn jaqsartý máselesine toqtaldy. Halyqpen «keri bailanys» ornatý quraldarynyń tiimdiligin arttyrý, sonyń ishinde partiianyń qoǵamdyq qabyldaý oryndarynyń qyzmetin jaqsartý máselelerine de nazar aýdaryldy.
Kezdesý sońynda Elbasy Partiiany qaita jandandyrý baǵdarlamasyn ázirleýdi jáne ony «Nur Otan» partiiasynyń Saiasi keńesi biýrosynyń qaraýyna shyǵarýdy tapsyrdy.
