"100 jańa oqýlyqtyń" alǵashqy seriiasyn tanystyrý rásimi kezinde Memleket basshysy Nursultan Nazarbaev dini bilimniń mańyzdylyǵyna erekshe toqtaldy, dep xabarlaidy QazAqparat tilshisi.
"Mysaly, qazaq tiline aýdarylǵan dini kitaptardy paraqtaǵanda bir máseleni oiladym, ata-babalarymyz sonyń bárin bilgende ekstremisterge de, terroristerge de naqty jaýap beretin edi. Olardyń qaidan shyqqanyn dáleldeitin edi. Sondyqtan aldymen dinniń tarixyn bilý kerek. Jaratýshy bir, oǵan jetý joldary ártúrli. Álemdik jáne dástúrli dinder sezin ótkizgende bári sol týraly aitady. Soǵan qaramastan, dinderdiń óz ishinde soǵystar tolastar emes. Mynaý musylmandar arasyndaǵy qyrǵyn soǵys Eýropada orta ǵasyrda bolǵan. Qazir biz sol kezeńnen ótip jatyrmyz. Olar bizge deiin ótip ketken", - dedi N.Nazarbaev.
Prezidenttiń aitýynsha, dini qyzmetkerler "100 jańa oqýlyq" aiasynda óz bilimderin shyńdap, saýaty ashylmaǵan jastardy durys jolǵa salýy tiis.
"Jalpy, bárimizge bilimdi shyńdap otyrý qajet. Áitpese, bárimiz dinde júrmiz, bári namaz oqidy. Búginde jurt qaptap meshitke barady. Al ishinde sanasy men túsinigi qandai? Qur ásheiin, elmen birge shýyldap júre berý kerek dep oilaidy. Olai emes. Árbir nárseniń óziniń maǵynasy bar. Sonyń bárin dúniejúzinde keńinen talqylaǵan, túbine jetken", - dep atap kórsetti Elbasy.
Memleket basshysy "100 jańa oqýlyq" jobasyna engen Karen Armstrongtyń "Qudaitaný baiany" atty kitabyn mysalǵa keltirdi. Atalǵan eńbekte avtor adam sanasyndaǵy qudaiǵa degen senimniń túp tamyry bir ekenin dáleldeidi. "Bizdiń din adamdaryna, ideologiia salasynda júrgen azamattarymyzǵa basqalarmen sóileskende osyny aitýǵa bolady. Adam sanasynda qudaiǵa senimniń túp-tamyry bir ekenin túsinetin bolsaq, ózara túsinistik, dinaralyq kelisim bolady. Bizdiń paiǵambarymyz - Muxammed (s.ǵ.s.) barlyq dinderdi syilaǵan. Qurannyń ishinde de árbir dinge qatysty maǵlumat bar. Al bizdiń keibir azamattarymyz ony da bilmeidi", - dedi N.Nazarbaev.
