QR Tuńǵysh Prezidenti Nursultan Nazarbaev Qazaqstandaǵy biliktiń aýysýy týraly pikir bildirdi, dep habarlaidy "Ult aqparat".
«Bilik tranziti týraly suraq jii qoiylyp júr. Meniń mandatym 2020 jyldyń sońynda aiaqtalýy tiis edi, biraq men osyndai sheshim qabyldadym. Nege? Oǵan ne sebep boldy? Eń aldymen, men Prezident laýazymyn naǵyz tanymal shaǵymda qaldyrdym. 2015 jyly sailaýda men 96% daýys jinadym. Meniń ketkenim úshin halyq qamyqqanyn bilemin. Biraq, bul biregei oqiǵa emes. Bir kezderi De Goll de laýazymynan bas tartqan, Li Kýan Iu, Mahathir myrzalar da ózi ketken», - dedi Nursultan Nazarbaev jyl saiynǵy Astana club paneldik otyrysynda.
Ol sovet kezinen beri Qazaqstan basshylyǵynda bolǵanyn atap ótti.
«1984 jyly meni Qazaqstan ministrleri keńesiniń tóraǵasy etip sailady. Sodan bergi 35 jylda – KSRO ydyraýynan keiingi aýyr jyldar bastan ótti, alyp memleket qirady. Barlyq bailanys úzildi, 2 million adam jumyssyz qaldy, elektr qýaty joq, dúkende nan men sút, shujyq joq. Men Qazaqstandy osy kúiinde qabyldap aldym. Bul jyldary el ekonomikasy 20 ese kóterildi, halyqtyń ál-aýqaty 19 ese ósti. Biz álem kartasynda bolmaǵan memleketti qurdyq. Qazir bul memleket - álem kartasynda bar jáne qurmet-bedelge ie», - dedi Elbasy.
Tuńǵysh Prezident barlyq shekara boiynsha dostyq ahýal ornaǵanyn jetkizdi.
«Shekaranyń 14,5 myń shaqyrym perimetri hattalǵan, shekaramyz aiqyndalǵan. Shekarasyz memleket bola ma? Kartaǵa qarasańyzdar, soltústikte Reseimen 7 myń shaqyrym ortaq shekaramyz bar. Shyǵysta Qytaimen – 1600 shaqyrym, ońtústikte Qyrǵyzstan, Ózbekstan, Túrkmenstanmen – 4 myń shaqyrym shekaramyz bar. Mundai ortada bizdiń kópvektorly saiasatymyz eshkimniń aýmaǵyna enbei, teń qarym-qatynas qurýǵa negizdeledi», - dedi N. Nazarbaev.
