Nursultan Nazarbaevtyń tóraǵalyǵymen Qaýipsizdik keńesiniń otyrysy ótti, dep habarlady Elbasynyń resmi saity.
Otyrys barysynda elimizdiń aqparattyq qaýipsizdigin qamtamasyz etý jáne Aqtóbe oblysynyń áleýmettik-ekonomikalyq damýy máseleleri qaraldy.
– Birinshi suraq – aqparattyq qaýipsizdik. Bul - ózekti másele. Qazirgi tańda dástúrli buqaralyq aqparat quraldaryna qaraǵanda Internet, onyń ishinde áleýmettik jeliler basym. Bir jaǵynan, bul jaqsy úrdis. Internette tanymdyq jáne aǵartýshylyq aqparat kóp. Ekinshi jaǵynan, kiberqaýipsizdikke bailanysty qaterler de barshylyq, - dedi Elbasy.
Qaýipsizdik Keńesiniń tóraǵasy aqparattyq qaýipsizdikti qamtamasyz etý salasynda halyqaralyq tájiribeni zertteýdiń mańyzdylyǵyn atap ótti.
– Bul máselede basqa eldermen tájiribe almasý qajet. Osy baǵytta damýdy qoldai otyryp adamdardyń qaýipsizdigin qamtamasyz etý mańyzdy, - dedi Qazaqstannyń Tuńǵysh Prezidenti.
Kún tártibindegi ekinshi másele boiynsha aqparatty tyńdai kele, Nursultan Nazarbaev Aqtóbe oblysynyń kólik-tranzittik damý áleýetiniń keibir aspektilerine nazar aýdardy.
Sonymen qatar, Elbasy óńirde kásipkerlik pen adami kapitaldy damytý úshin qolaily orta qalyptastyrý qajettigin aitty.
Sondai-aq, otyrysta batys makroóńiriniń agroónerkásiptik habyn qurý máseleleri qaraldy.
Qaýipsizdik keńesi otyrysynyń qorytyndysy boiynsha Úkimet pen Aqtóbe oblysynyń ákimdigine tiisti tapsyrmalar berildi.
