Elordada Nur Otan partiiasynyń tóraǵasy, Elbasy Nursultan Nazarbaevtyń qatysýymen Saiasi keńestiń keńeitilgen otyrysy bastaldy, dep habarlaidy Sputnik Qazaqstan.
Jiyn barysynda partiiany "qaita júkteý" baǵdarlamasy talqylanady degen jospar bar. Budan bólek, Saiasi keńestiń biýrosyna jańa músheler qabyldanady.
"Búgin biz el damýynyń negizgi baǵyttary boiynsha biraz másele jóninde sóz kóteretin bolamyz. Sol úshin saiasi keńestiń keńeitilgen otyrysyna jinalyp otyrmyz. Úkimet músheleri, partiianyń Májilistegi fraktsiiasy, oblystardaǵy filialdardyń jetekshileri qatysyp otyr. Biyl partiiamyz úshin aýqymdy jumys atqarylyp jatqanyn bilemiz. Eki sezd ótkizdik. Partiiamyzdyń 20 jyldyǵyn ótkizdik. Maýsym aiynda prezident sailaýynda bizdiń kandidatymyz – Qasym-Jomart Kemeluly Toqaev jeńiske jetti. Halyq bizdiń jumysymyzdyń nátijesin kórip jatyr", - dedi Nazarbaev.
Partiia tóraǵasynyń aitýynsha, jańa saiasi jaǵdaida partiianyń róli artyp otyr. Osyǵan orai búgingi keńeste aldaǵy maqsattardy talqylaý josparlanyp otyr.
Sondai-aq, QR Tuńǵysh Prezidentiniń atap ótýinshe, halyq Táýelsizdik jyldarynda elimizdiń bilik partiiasy atqarǵan jumystardyń barlyǵyn kórip otyr.
«Degenmen, ómir bir ornynda turmaidy. Bári ózgeriske ushyrap jatyr. Búkil álemde de saiasi partiialar búgingi kúni jańa mindettermen betpe-bet kelýde. Halyqaralyq tájiribe kórsetip otyrǵandai, turaqsyzdyq kezeńinde alǵa ilgerileý úshin jetekshi saiasi kúshtiń ishindegi, sonymen qatar qoǵamdaǵy birlik qajet. Onsyz úlken mindetterdi oryndaý múmkin emes. Jańa saiasi jaǵdaida partiianyń róli aitarlyqtai óse túsedi», - dedi Nursultan Nazarbaev
Otyrys baǵdarlamasyna sáikes, Úkimet basshysy Asqar Mamin partiianyń sailaýaldy baǵdarlamasyn iske asyrý boiynsha esep beredi. Odan keiin partiia tóraǵasynyń orynbasary Baýyrjan Baibek partiiany "qaita júkteýdiń" negizgi baǵyttary týraly aityp beredi.
Aita keteiik, 16 tamyzda Nur Otan partiiasynyń saiasi keńesi biýrosynyń jabyq otyrysy ótken bolatyn. Oǵan Elbasy Nursultan Nazarbaev pen Memleket basshysy Qasym-Jomart Toqaev qatysty. Osy jiynda Nazarbaev partiianyń májilis sailaýyna daiyndyq sharalaryn kúsheitýdi tapsyrǵan. Sailaý Konstitýtsiiada kórsetilgen merzimde ótedi. Budan bólek, Qazaqstannyń Tuńǵysh prezidenti eline jany ashityn qazaqstandyqtarǵa úndeý jasaǵan bolatyn.
"Biz óz bastamalaryn usynatyn belsendi azamattardy, blogerlerdiń bárin kóremiz, estimiz. Óz eline shynymen jany ashysa, biz olardy birge jumys isteýge shaqyramyz. Óz ideialaryn Nur Otan partiiasy aiasynda júzege asyra alady", - dedi Nazarbaev.
Sol kúni saiasi keńestiń keńeitilgen otyrysyn ótkizý týraly qaýlyǵa qol qoiyldy.
Nur Otan-nyń saiasi keńesi nemen ainalysady?
Saiasi keńes partiianyń joǵarǵy organy bolyp sanalady. Osy qurylym sezde qabyldanǵan sheshimderdi iske asyrý boiynsha negizgi baǵyttardy aiqyndaidy. Keńestiń quramyna 100 adam kiredi. Oǵan prezidentten basqa parlament palatalarynyń eki spikeri, úkimet basshysy, memlekettik hatshy jáne taǵy basqa qoǵam qyzmetkerleri kiredi.
Partiianyń saiasi keńesi:
-
partiia seziniń sheshimderin oryndaý jónindegi partiia organdary qyzmetiniń negizgi baǵyttaryn belgileidi;
-
partiianyń sailaý naýqandaryna qatysýyna bailanysty máselelerdi qarastyrady;
-
partiianyń atynan saiasi málimdemeler men úndeýlerdi qarastyrady jáne engizedi;
-
qalyptasqan qoǵamdyq qatynastar boiynsha partiia ustanymyn belgileidi;
-
partiia Tóraǵasynyń usynysy boiynsha óz quramynan partiia Saiasi keńesi biýrosynyń múshelerin sailaidy;
-
partiia sezin shaqyrady, olardyń kún tártibin ázirleidi;
-
partiianyń ishki pikirtalastaryn ótkizý týraly sheshimder qabyldaidy, olardyń ótkizilýin jáne qorytyndylanýyn uiymdastyrady;
-
partiia seziniń aiyryqsha quzyretine jatpaityn partiia qyzmetiniń basqa da máselelerin sheshedi.
Partiianyń Saiasi keńesi óz quzyretine jatatyn jekelegen máselelerdi partiianyń Saiasi keńesi biýrosynyń qaraýyna berýge quqyly.
