Elbasy Qazaq ulttyq óner ýniversitetiniń 20 jyldyq mereitoiyna arnalǵan saltanatty kontsertke bardy, - dep habarlaidy "Ult aqparat" Aqordaǵa silteme jasap.
Merekelik kontsertte qazaq jáne shetel kompozitorlarynyń túrli janrdaǵy tanymal týyndylary kórermenge usynyldy. Olardyń qatarynda Keńes Dúisekeevtiń «Óner ordasy» shyǵarmasy, Evgenii Brýsilovskiidiń «Qyz Jibek» operasynan úzindi, Latif Hamididiń «Bulbul» áni, Leonard Bernstainnyń «Vestsaid tarihy» miýziklinen «Simfoniialyq biler» jáne basqa da kóptegen týyndylar oryndaldy.
Qazaqstan Prezidenti barsha jurtty ýniversitettiń 20 jyldyǵymen quttyqtap, aýqymdy mádeniet oshaqtary elorda mártebesin asqaqtata túsetinin atap ótti.
– Shyǵarmashyl ziialy qaýym elordanyń mádeni ómirine eleýli úles qosyp keledi. Men Astanaǵa Almatydan jáne búkil Qazaqstannan mádeniet salasynyń úzdik ókilderin shaqyrdym. Álemde kóptegen ýniversitet bar, biraq Óner ýniversiteti tek Astanada ǵana boi kóterdi. Búginde elordada Opera jáne balet teatry, Horeografiia akademiiasy, Ortalyq kontsert zaly jáne basqa da mádeniet oshaqtary ashyldy. Osynyń bári elimizdiń bolashaǵy úshin, mádenietimiz ben ónerimiz úshin jasalyp jatyr, – dedi Nursultan Nazarbaev.
Memleket basshysy Óner ýniversitetiniń qalyptasyp, damýy úshin onyń basshylyǵy men professor-oqytýshylar qaýymynyń zor ról atqarǵanyn aitty.
– Ýniversitet janynda kolledj, bakalavriat, magistratýra jáne doktorantýra bar. 3 myńǵa jýyq stýdent bilim alýda. 20 jyl ishinde ýniversitettiń 500-den astam túlegi halyqaralyq konkýrstar men baiqaýlardyń laýreaty atandy. Sizderge tabys tileimin, Otanymyz – Qazaqstan Respýblikasynyń abyroiyn asqaqtatatyn ataqty mýzykanttardyń shyǵýyna jáne jańa esimderdiń tanylýyna niettestik bildiremin! – dep túiindedi Elbasy.
