Memleket basshysy Habar telearnasyna bergen suhbatynda óziniń arnaiy baǵdarlamalyq maqalasynda aitylǵan «Qazaqstandaǵy 100 jańa esim» jobasy týraly da pikir bildirdi, dep habarlaidy "Ult aqparat".
Elbasy Táýelsizdiktiń 26 jylynda elge tanylǵan, dúniejúzine maqtanyshpen kórsetýge laiyq talantty da talapty tulǵalardy iriktep alý qajettigin jáne olarǵa jan-jaqty qoldaý kórsetilýi kerektigin erekshe atap ótti.
«Táýelsizdiktiń 26 jyldyǵyna kele jatyrmyz, osy 26 jyl ishinde elge tanylǵan, maqtaýǵa turatyndai, syrtqa shyǵaryp kórsetetindei, eń úzdik 100 esimdi anyqtaý kerek. Esimdi shyǵaratyn - adamnyń óz talanty, árine. Ekinshiden, sol talantty álemge tanytyp, pash etetin jaǵdai bolýy kerek. Sondyqtan, ondai tulǵalarymyz 100 bolsa da, 25 bolsa da, dúniejúzine nasihattaýǵa tiispiz. Olardyń shyǵarmalaryn shet tilderine aýdaryp, aqparat quraldarynan kórsetip, «Mine, qazaqta osyndai tulǵalar bar, osyndai shyǵarmalar bar» dep maqtanýǵa bolady», - dedi Nursultan Nazarbaev.
Sonymen birge, Elbasy rýhani jańǵyrý jumystaryna el bolyp, jumyla kirisý qajettigin de qadap aitty.
«Talai ziialylarmen kezdesip júrgende, olar kópten kútken másele edi dep aitty. Al endi kópten kúttik dep taǵy da Astanaǵa qarap ne aitar eken dep otyrmai, árqaisymyz osynyń tóńireginde jumys istep, nasihattaýymyz kerek. Men naqty qolǵa alyp otyrmyn. Bul negizinen jergilikti biliktiń, ákimderdiń qolynda dep sanaimyn. Sol jerden bastalýy kerek te, árige deiin jetkizýimiz kerek. Bir sózben aitqanda, Qazaqstan - bizdiń Otanymyz. Bizdiń basqa Otanymyz joq. Qazaqtyń Otany - jalǵyz Qazaqstan. Munyń barlyǵy sol Otandy súiý, sol Otandy madaqtaý, osy Otandy dúniejúzine belgili etý úshin jasalyp otyr», - dedi Prezident.
