Qazaqstannyń Tuńǵysh Prezidenti – Elbasy Nursultan Nazarbaev Táýelsizdik kúnine arnalǵan merekelik kontsertke qatysty, dep habarlaidy "Ult aqparat" elbasy.kz saityna silteme jasap.
Shara barysynda Elbasy barlyq qazaqstandyqtardy Táýelsizdik kúnimen quttyqtady.
- 1991 jyly 16 jeltoqsanda arnaiy zań qabyldap, búkil álemge Qazaqstannyń táýelsizdigin jariialadyq. Biz eldigimizdiń jańa dáýiriniń negizin qalap, kýágerleri boldyq. Ata-babalarymyzdyń san ǵasyrlyq armanyn oryndaý mártebesi bizdiń býynǵa buiyrǵanyn maqtan tutamyn, - dedi Qazaqstannyń Tuńǵysh Prezidenti.
Nursultan Nazarbaev basqa memleketter ǵasyrlar boiy júrip ótken úlken joldy Qazaqstan 28 jyl ishinde ótkergenin atap ótti.
- Halyqtyń birliginiń arqasynda qýatty, táýelsiz jáne gúldengen memleket qurdyq. Osy jolda men sizderdiń árqaisylaryńyzdyń, árbir qazaqstandyqtyń úlken qoldaýyn sezindim. Barshańyzǵa rizashylyǵymdy bildiremin, - dedi Elbasy.
Qazaqstannyń Tuńǵysh Prezidenti elimizdiń táýelsizdik jyldary qol jetkizgen jetistikteri týraly aitty.
- Táýelsizdik jyldarynda biz ashyq jáne naryqtyq ekonomika qurdyq. Qazaqstan ekonomikanyń kólemi jáne investitsiialar tartý jaǵynan Ortalyq Aziia óńirinde kósh bastap keledi. Biz geosaiasi áleýetimizdi qurlyqtyń shyǵysy men batysyn bailanystyratyn kólik dálizin qurý arqyly iske asyrdyq, - dedi Nursultan Nazarbaev.
Elbasy memleket taǵdyryna degen senim pen jaýapkershilik, halyqtyń erik-jigeri bizdiń ultymyzdy biriktirgenin atap ótti.
- Táýelsizdik - halyqqa qanat bitiretin qundylyq. Mundai baǵa jetpes bailyq kez kelgen halyqqa buiyra bermeidi. Oǵan qol jetkizgen kúnniń ózinde de bári birdei igiligin kóre almaýy múmkin. 1991 jyly biz qanatymyzdy keńge jaiyp, jarqyn bolashaqqa qadam bastyq, - dedi Qazaqstannyń Tuńǵysh Prezidenti.
Nursultan Nazarbaev qazaqstandyqtardyń jas býynyna arnaiy úndeý jasady.
- Biz sender jaqsy ómir súrý úshin barlyq jaǵdaidy jasadyq. Sondyqtan tek qana alǵa umtylyp, biik belesterdi baǵyndyryńdar, asqar asýlarǵa talpynyńdar. Eń bastysy – elimizde birlik, beibitshilik pen kelisimdi saqtai bilińder. Bul – bizdiń Táýelsizdigimizdiń basty jetistigi jáne aldaǵy jeńisterimizdiń kepili, - dedi Elbasy.
Qazaqstannyń Tuńǵysh Prezidenti óziniń otyz jyl boiy eldiń jarqyn bolashaǵy úshin qyzmet etý mártebesine ie bolǵanyn maqtan tutatynyn aitty.
- Táýelsizdik jyldary memleketimizdiń qol jetkizgen jetistikterin eselei túsý mańyzdy. Sondyqtan barlyǵymyz Prezident Qasym-Jomart Toqaevpen birge bolýymyz kerek. Bizdiń oiymyz da bir, murat-maqsatymyz da ortaq. Ol – Qazaqstannyń Táýelsizdigin nyǵaitý, - dedi Nursultan Nazarbaev.
Sóz sońynda Elbasy barsha halyqty taǵy da Táýelsizdik kúnimen quttyqtady.
