Qazaqstan Respýblikasynyń Tuńǵysh Prezidenti – Elbasy qazaqstandyqtardy Otan qorǵaýshy kúnimen quttyqtady, dep habarlaidy "Ult aqparat" elbasy.kz saityna silteme jasap.
«Qurmetti qazaqstandyqtar! Barshańyzdy Otan qorǵaýshy kúnimen quttyqtaimyn! Táýelsizdik jyldarynda elimizdiń qarýly kúshteri memleketimizdiń turaqtylyǵynyń, aýmaqtyq tutastyǵy men áskeri qaýipsizdiginiń kepili boldy. Biz árdaiym armiiany damytýǵa, onyń qorǵanys qabiletin arttyrýǵa, áskerilerdi jan-jaqty qoldaýǵa basa kóńil bóldik. Sonyń arqasynda Qazaqstan áskeriniń sapynda bolý rýhy myqty adamdardyń mártebeli ári jaýapty mindetine ainaldy. Búginde Otan aldyndaǵy boryshty óteý men adal qyzmet etý –abyroily is. Áskeri forma kigen adam jaýapkershiligi joǵary, naǵyz patriot bolyp sanalady» delingen quttyqtaý hatynda.
Sondai-aq, Elbasy táýelsizdigimizdi qorǵai alatyn qýatty da aibyndy armiiamyz baryn atap ótti.
«Qazaqstan Respýblikasynyń Qarýly Kúshterin qurý týraly Jarlyqqa qol qoiǵan kúnnen bastap tiimdi qaýipsizdik júiesin qurǵanǵa deiingi aralyqta elimiz aýqymdy joldan ótti. Búginde bizdiń eń basty qundylyǵymyz – táýelsizdigimizdi qorǵai alatyn qýatty da aibyndy armiiamyz bar. Otan qorǵaýshylardy jáne barlyq qazaqstandyqtardy osy merekemen quttyqtaimyn! Barshańyzǵa myqty densaýlyq, tynyshtyq pen baq-bereke tileimin!» - dep túidi sózin Tuńǵysh Prezident.
