Túrkistan qalasyna sapary barysynda Nursultan Nazarbaev Qazaq handyǵyna arnalǵan memorialdyń ashylý rásimine qatysty, sondai-aq «Tuńǵysh Prezident saiabaǵyn» odan ári abattandyrý josparymen tanysty, dep habarlaidy "Ult aqparat" Elbasy.kz saityna silteme jasap.
Memorialdyń ashylý rásimi aiasynda Nursultan Nazarbaev «Uly Dala birligi» kapsýlasyn saldy. Kapsýlaǵa Qazaqstannyń barlyq óńirlerindegi kieli jerlerdiń topyraǵy jinalǵan.
Aita keteiik, «Qazaq handyǵyna arnalǵan memorialdyq keshen» qazaq handyǵynyń negizin qalaýshylardyń qurmetine turǵyzylǵan. Keshende iilgen 21 qanatty kórýge bolady. Bul Túrkistanda jerlengen 21 handy bildiredi. Esim hannan Áliken hanǵa deiingi babalarymyzdyń esimderi men basqarǵan jyldary da jazylǵan.
Memorialdyń arhitektýralyq sheshimi – biiktigi 7 metrlik satyly 21 pilonnan turatyn, diametri 35 metrge teń kiiz úi beineli kompozitsiia.
Sáýlet kesheniniń ortalyq bóligindegi granit tuǵyrda handar ustaityn asataiaq pishindes, biiktigi 12 metrge teń stela ornatylǵan. Onyń túbinde tórt taýteke músini bar. Ortalyq kompozitsiiany ishki jaǵynan uzyndyǵy 28 metrlik «Qazaq handyǵynyń tarihy» barelefi qorshap tur.
Jobalaý quny 1,9 mlrd teńge bolatyn memorialdyq keshenniń jalpy aýdany 0,85 ga quraidy. Jańa nysannyń baralefinde qazaq bileriniń, qazaq danalarynyń kórkemsózderi qashalǵan. Sheńber tárizdes salynǵan pilondardaǵy granittik taqtaishalarǵa qazaq dalasyn basqarǵan 21 hannyń esimderimen qatar olardyń bilik júrgizgen jyldary da jazylǵan.
«Túrkistannyń ultaraqtai jeri at basyndai altynǵa tatidy degen ras eken. Biz qala bundai jyldam damidy dep oilamadyq. Túrki áleminiń rýhani astanasyna ainalǵan Túrkistannyń osynshama jyldam damýy Elbasynyń arqasy. Túlegen Túrkistannyń qazirgi kelbeti - Elbasynyń týyndysy. El aǵylyp kelip jatyr. Buryn ystyqtan kúndiz júre almaitynbyz. Qazir barlyq jerde sýburqaq, saiabaq salyndy, taldar egildi. Ainala kók maisa. Kóz toimas ǵimarattar ashylyp jatyr. Osynyń bári Elbasynyń eńbegi. Isteimin degen adamǵa qazir Túrkistanda jumys kóp. Qasietti qalamyzdyń álide adam tanymastai ózgere beretine senemiz. Túrkistan álemdegi kóptegen halyqtardyń rýhani ortalyǵyna ainalyp otyr. Bunda kelgen adamdardyń júzinen meiirim kórinedi. Túrkistan júrekke iman úiiredi. Qala kóńilge tynyshtyq, jailylyq syilaidy», - deidi Qoja Ahmet Iasaýi atyndaǵy Qazaq-Túrik halyqaralyq ýniversitetiniń dotsenti Gúlsara Toqylova.
