Qazaqstannyń Tuńǵysh Prezidenti Nursultan Nazarbaev UQK-nyń eks-basshysy Kárim Másimovtyń ustalýyna qatysty pikir bildirdi, dep habarlaidy Sputnik Qazaqstan saiasattanýshy Daniiar Áshimbaevtyń Telegram-arnasyna silteme jasap.
Saiasattanýshy Elbasy keńsesine birneshe suraq jibergen. Nursultan Nazarbaev ózi habarlasyp, saýaldaryna telefon arqyly jaýap berdi. Sonyń ishinde Nazarbaev ýniversiteti jáne onyń ústinen qaraityn qorǵa qatysty másele de bar.
"Qor bilim berý máselelerimen ǵana emes, investitsiialyq qyzmetpen de ainalysady, tipti belgili bir qarjy institýttarymen bailanysy bar degen aqparat tarady. Sizdiń sol uiymdarda rólińiz qandai?", - dep surady Áshimbaev.
Nazarbaev 2011 jyly óz qolymen arnaiy zańǵa qol qoiǵanyn eske saldy. Oǵan sáikes, Nazarbaev qory – kommertsiialyq emes uiym. Ony Nazarbaev ýniversiteti men Ziiatkerlik mektepterdi qarjylandyrý úshin ǵana qurǵan.
"Búginde kóptegen ýniversitette endaýment qorlar bar. Bizdiń qorymyz da sondai. Al Nazarbaev ýniversitetiniń qarjysyn basqarý máselelerimen, investitsiialyq qyzmetimen, sonyń ishinde bólek qarjy institýttarymen bailanysty jumyspen joǵary oqý ornynyń qamqorshylyq keńesi ainalysqan. Keńes tóraǵalyǵyna sol kezde premer-ministr bolǵan Kárim Másimov taǵaiyndaldy", - deidi Nazarbaev.
Onyń aitýynsha, keńes tóraǵasy qyzmetine joǵary oqý orny men onymen bailanysy bar uiymdardyń qarjylyq qyzmetine de jaýapty bolǵan.
"Dál sol kisiniń quziretine joǵary oqý orny men onymen bailanysy bar qurylymdardyń qarjylyq qyzmeti kirgen. Arasyna bólek qarjy uiymdary da kirip ketti. Qazir Kárim Másimovke qatysty tergeý sharalary júrgizilip jatyr. Quqyq qorǵaý organdary onyń osy baǵyttaǵy jumysyn zerdelep shyǵady dep oilaimyn", - dedi Nazarbaev.
Budan bólek, Nursultan Nazarbaev qory bar. 2000 jyly qurylǵan uiym bilim berý, mádeni-áleýmettik, halyqaralyq jáne qaiyrymdylyq qyzmetpen ainalysady.
