Qaýipsizdik Keńesiniń Tóraǵasy Nursultan Nazarbaev Premer-Ministr Asqar Maminmen kezdesti. Bul týraly elbasy.kz saity habarlady.
Kezdesý barysynda biylǵy 7 aidyń qorytyndysy boiynsha elimizdiń ekonomikalyq damý nátijeleri men pandemiiadan keiingi kezeńge arnalǵan jumys jospary talqylandy.
Premer-Ministrdiń usynǵan málimeti boiynsha, jyl basynan beri ekonomikanyń mashina jasaý, óńdeý jáne taý-ken óndirisi, qurylys, basqa da negizgi salalaryndaǵy kórsetkishter oń qarqyn alǵan.
Elbasy Qazaqstanda buǵan deiin qabyldanǵan memlekettik baǵdarlamalar qazirgi daǵdarystyń ulttyq ekonomikaǵa teris áserin azaitýǵa múmkindik bergenin atap ótti.
«Biz táýelsizdik jyldaryndaǵy eń kúrdeli kezeńdi bastan ótkerip jatyrmyz. Osy ýaqyt ishinde talai daǵdarysty eńserdik. Qazirgi qiyndyq álemniń búkil elin qamtyp otyr. Barlyq jerde jumyssyzdyqtyń kóbeiýi baiqalýda, biznes qiyndyqtarǵa tap bolyp, memleketter arasyndaǵy saýda-sattyq deńgeii tómendedi. Alaida buǵan deiin qabyldanǵan sharalar daǵdarystyń ekonomikamyzǵa áserin azaitýǵa kómektesti. Bizdiń ekonomikalyq kórsetkishterdiń tómendeýi basqa eldermen salystyrǵanda úsh ese az», – dedi Nursultan Nazarbaev.
Qazaqstannyń Tuńǵysh Prezidenti kúrdeli kezeńdegi eldiń áleýmettik-ekonomikalyq damýyn qoldaý baǵytynda otandyq biznestiń belsendiligi joǵary ekenin atap ótti.
«Iri biznes jumys oryndaryn saqtap qalýǵa kómektesti, halyqtyń álsiz toptaryn qoldaýǵa qarajat bóldi, sondai-aq «Biz birgemiz» bastamasyn ilgeriletýge úlesin qosty. Men barlyq biznes ókilderine rizashylyǵymdy bildiremin. «Birgemiz» qory arqyly biz 2,3 million qazaqstandyqqa qoldaý kórsete aldyq», – dedi Elbasy.
Nursultan Nazarbaev daǵdarystan keiingi kezeńdegi ekonomikalyq ósim máselesin qarastyryp, otandyq biznesti jandandyrý jáne azamattardyń ál-aýqatyn jaqsartý qajettigin atap ótti. Úkimet ekonomikanyń túrli salasyndaǵy ósimdi qamtamasyz etý úshin naqty sharalar qabyldaýy kerek ekendigi aityldy.
«Qazirgi ýaqytta sarapshylar ekonomikalyq daǵdarys pen pandemiianyń ekinshi tolqyny keletinin boljaýda. Mamandar bul máseleni muqiiat zerttep, osy jaǵdaiǵa arnaýly baǵdarlama ázirleýi kerek. Jańa tásilder men tiisti sharalar qajet», – dedi Qazaqstannyń Tuńǵysh Prezidenti.
Sonymen qatar Elbasy koronavirýs infektsiiasynyń taralýyna qarsy kúres aiasyndaǵy aqparattyq-túsindirý jumystary máselesine toqtaldy.
«Qaýipti dertti juqtyryp almaý adamnyń ózine jáne tártibine bailanysty ekenin túsindirgen memleketter utylǵan joq. Keibir elderde karantin sharalary qabyldanbady, óitkeni adamdar saqtyq sharalaryn saqtap, mamandardyń talabyn oryndady», – dedi Nursultan Nazarbaev.
Qazaqstannyń Tuńǵysh Prezidenti geosaiasi qaqtyǵystar men qarama-qaishylyqtar órship turǵan jaǵdaida Qazaqstan qoǵamynyń birligi men turaqtylyǵyn saqtaýdyń mańyzdylyǵyn atap ótti.
«Bizdiń basty mindetimiz – daǵdarysqa qaramai, elimizdiń ulttyq qaýipsizdigin qamtamasyz etý. Ishki turaqtylyqty saqtaýymyz kerek. Qoǵam tutastyǵy men saiasi turaqtylyq – bizdiń alǵa jyljýymyzdyń negizi ekenin jurtshylyq esten shyǵarmaǵany jón. Biz árdaiym memlekettiń jáne «Nur Otan» partiiasy siiaqty saiasi kúshtiń ainalasyna toptasý arqyly daǵdarystardy eńsere bildik. Bul synaqtan da aman ótetinimizge senimdimin. Ekonomikanyń ósimi qamtamasyz etiletin bolady. Bul qazaqstandyqtardyń turmys-tirshiligine oń yqpal etedi. Memleket qaitadan qarjy jinaqtaidy. Ol qarajat qazaqstandyqtardyń igiligi úshin, sondai-aq «Qazaqstan-2050» strategiialyq baǵdarlasynyń oryndalýyna paidalanylatyn bolady», – dedi Elbasy.
Kezdesý sońynda Nursultan Nazarbaev jahandyq ekonomikalyq daǵdarystardan ótýde Qazaqstannyń mol tájiribesi, sondai-aq ekonomikanyń turaqty ósimin qamtamasyz etýge múmkindigi bar ekenin atap ótti.
«Jurt jumysqa shyǵyp, aqsha tabýy úshin Úkimet jumys oryndaryn kóbeitýge tyrysýy kerek. Bizde úlken tájiribe, qarajat, múmkindikter bar. Osynyń bárinen súrinbei ótemiz», – dedi Qazaqstannyń Tuńǵysh Prezidenti.
