Nursultan Nazarbaev Indoneziia Respýblikasynyń Prezidenti Djoko Vidodoǵa kóńil aitý jedelhatyn joldady, dep habarlaidy Aqorda.
Memleket basshysy «Lion Air» áýe kompaniiasynyń jolaýshylar ushaǵynyń apatqa ushyraýy saldarynan kóptegen adamnyń qaza bolǵany týraly habardy zor kúizelispen qabyldady.
«Qazaqstan halqynyń jáne jeke ózimniń atymnan qaza bolǵandardyń týǵan-týysqandary men jaqyndaryna, sondai-aq barsha Indoneziia halqyna kóńil aityp, qaiǵylaryna ortaqtastyǵymdy bildiremin», - delingen jedelhatta.
Eske sala ketsek, Indoneziianyń Lion Air áýe kompaniiasynyń jolaýshylar ushaǵy búgin tańerteń apatqa ushyraǵan bolatyn. Jakarta Post aqparaty boiynsha, ushaq jergilikti ýaqytpen tańǵy saǵat 6:20-da áýege kóterilgen. 13 minýt ótkennen keiin ushaq radardan joǵalyp, onymen bailanys úzilgen.
Indoneziia qutqarý qyzmetiniń aqparaty boiynsha, Djakartadan Pankalpinangqa ushyp bara jatqan Boeing 737 MAX 8 ushaǵy teńizge qulaǵan. Bortta qansha jolaýshy jáne ekipaj múshesi bolǵany týraly, sondai-aq ushaqtyń nelikten apatqa ushyraǵany jaily ázirge naqty aqparat joq.
