QR Tuńǵysh Prezidenti Nursultan Nazarbaev Eýraziia keńistigindegi geosaiasi jaǵdaiǵa áserin tigizetin qaýipterdi atady, dep habarlaidy QazAqparat tilshisi.
«Men de Eýraziiadaǵy geosaiasi jaǵdaiǵa jaǵymsyz áserin tigizetin qaýipter jaily kózqarasymdy bildirsem dep edim. Birinshiden, bizdi kele jatqan daǵdarystan habar beretin álemdik ekonomikadaǵy ahýal alańdatady. Saýda teketiresteri ósip kele jatqandyqtan, geosaiasi turaqsyzdyq ahýalyna álemdik institýttar teris baǵasyn berip jatyr. Jahandyq ósimniń báseńdeýi álemdik saýdaǵa teris yqpalyn tigizip keledi. Jahandyq memlekettik qaryzdyń deńgeii 2007 jylǵy daǵdarys aldyndaǵy qaryz deńgeiinen eki ese artyp, álemdik JIÓ-niń 80 paiyzyna jetti. Bul faktorlardyń barlyǵy álemdik turaqtylyqty teńseltip, Eýraziia elderine qatty yqpal etip otyr», - dedi Nursultan Nazarbaev Astana Club otyrysynda.
Tuńǵysh Prezident Astana Club otyrysyna qatysýshylardyń birqatarymen jeke kezdeskenin, dál sol kezdesýlerde atalǵan máseleler talqylanǵanyn tilge tiek etti.
«Ekinshiden, álemdik derjavalar arasyndaǵy básekelestik jańa deńgeige shyqty. Ózara sanktsiialar, saýda soǵystary – AQSh pen QHR-dyń qazirgi qarym-qatynasynyń qalypty jaǵdaiyna ainalyp ketken. Agressivti ritorika, ekonomikalyq sanktsiia – Batys pen Resei arasyndaǵy negizgi qatynas tili bolyp tur. Turaqty kommýnikatsiia arnalarynyń bolmaýy ahýaldy odan saiyn qiyndatyp otyr. Jetekshi derjavalardyń arasyndaǵy teketires avtomatty túrde Eýraziianyń ystyq núktelerine aýysyp otyrady. Ol jaǵdai Siriia men Ýkrainadaǵy máseleni beibit túrde sheshý amaldaryn qiyndatady. Al Breksit – sońǵy ýaqyttyń negizgi antiintegratsiialyq oqiǵasyna ainaldy», - dedi ol.
Aita ketsek, elordada QR Tuńǵysh Prezidenti Nursultan Nazarbaevtyń qatysýymen Astana Club otyrysy ótip jatyr. Kezekti basqosýǵa álemniń 23 memleketinen geosaiasat, ekonomika men halyqaralyq qatynastar salasynyń mańdaialdy sarapshysy retinde moiyndalǵan 50-den astam halyqaralyq spiker qatysýda. Qurmetti meimandardyń qatarynda - 3 burynǵy memleket basshysy, 5 eks-premer-ministr, 10 ministr jáne Nobel syilyǵynyń laýreaty bar.
