Qazaqstan Prezidenti Respýblikalyq biýdjettiń atqarylýyn baqylaý jónindegi esep komitetiniń tóraiymy Natalia Godýnovany qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysyna Respýblikalyq biýdjettiń atqarylýyn baqylaý jónindegi esep komitetiniń qazirgi qyzmeti jáne memlekettik baǵdarlamalardyń aýditi, sondai-aq óńirlerdegi tekserý komissiialaryna kórsetilip jatqan ádistemelik qoldaý jumystary týraly málimet berildi.
Nursultan Nazarbaev biýdjet qarjysyn tiimdi igerýdi jáne onyń qoldy bolýyna jol bermeýdi qamtamasyz etý isindegi Esep komitetiniń mańyzdy rólin atap ótti.
– Esep komiteti – memleket qarjysynyń oryndy igerilýin jáne biýdjettiń atqarylýyn táýelsiz baǵalaýdy qamtamasyz etetin mańyzdy organ. Qarajat tek kózdelgen maqsatqa bólinýge tiis, – dedi Qazaqstan Prezidenti.
N.Godýnova «100 naqty qadam» Ult jospary aiasynda júzege asyrylyp jatqan memlekettik aýdit júiesin álemdik standarttarǵa sai jańǵyrtýdyń barysy jóninde baiandady.
– Qazirgi ýaqytta Esep komiteti óz jumysynda qarjyǵa qatysty quqyq buzýshylyq faktilerin anyqtaý tájiribesinen góri tiimdilikti baǵalaýǵa basty mán berip otyr. Biz qarjylyq quqyq buzýshylyqqa negiz bolatyn sebepterdi anyqtaý isinde aýdit nysandaryna qoldaý kórsetemiz jáne tiisti usynymdar beremiz, – dedi Esep komitetiniń tóraiymy.
Sonymen qatar, N.Godýnova Qazaqstan Prezidentine memlekettik baǵdarlamalar men memlekettik organdardyń strategiialyq josparlaryna aýdit júrgizý jáne respýblikalyq biýdjetti josparlaý kezinde aldyn ala baǵalaý jóninde baiandady.
Kezdesý sońynda Qazaqstan Prezidenti birqatar naqty tapsyrma berdi.
