Nursultan Nazarbaev elordadaǵy №52 sailaý ýchaskesinde prezidenttik sailaýdaǵy tańdaýyn jasady.
"Qazaqstan halqy prezident sailaýyna qatynasyp jatyr. Ár ýaqytta ár eldi mundai sailaý halyq úshin tarihi sheshim bolyp tabylady. El ýchaskelerge kelip, tek prezident sailamaidy. Óziniń turmysyn, taǵdyryn, bolashaqqa degen úmitin kórsetetin bolady. Men bilemin, halqymyzdyń oiy - el aman, jurt tynysh bolsa, elimizdiń osylai órkendep óse berse, ár januiada jaqsylyq bolsa, elimiz órkendegen saiyn halqymyzdyń ál-aýqaty jaqsara berse degen oi", - dedi Nursultan Nazarbaev.
Elbasy osy jylǵy kezekten tys prezidenttik sailaýdyń Qazaqstan tarihynda alar orny bólek ekenin atap ótti.
"Biylǵy sailaýdyń mánisi - óz aldyna basqa. Ózderińiz bilesizder, men óz ókilettigimdi toqtatyp, kelesi býynǵa jol berdim. Ol - durys. Bul sheshimdi búkil dúnie qoldap jatyr. Búgingi sailaý sátti ótsin, qutty bolsyn, jaqsylyǵymyzǵa daýysyn dep tilek aitamyn", - dedi ol.
Atalǵan sailaý ýchaskesiniń tóraiymy Qymbat Irgebaevanyń sózine qaraǵanda, ýchaskede 3 417 sailaýshy tirkelgen.
«Búgin daýys berýshilerdiń joǵary belsendigin kútip otyrmyz. Ótken jolǵy sailaý kezinde bizdiń ýchaskege kelgenderdiń qarasy qalyń boldy. Sońǵy 20 kúnde turǵyndardyń kóbisi bizge habarlasyp, málimet aldy. Sonymen qatar bul ýchaskede Nursultan Ábishulyn úlken qurmetpen kúttik. Tuńǵysh Prezident osyǵan deiingi bolǵan sailaýda da osy ýchaskede daýys bergen bolatyn», - dedi Q. Irgebaeva.
Onyń sózine qaraǵanda, ýchaskege saǵat 06:00-den bastap baiqaýshylar, BAQ ókilderi, prezidenttikke kandidattardyń senimdi ókilderi kelip tirkeldi.
«Saǵat 07:00-den bastap turǵyndar daýys berýge kelip jatyr. Olardyń arasynda jastar da, egde jastaǵy adamdar da bar. Sondyqtan búgin sailaýshylarymyz kóptep keledi degen oilamyn. Aita keteiik, tańerteńnen beri baiqaýshylar tarapynan eskertýler bolmady», - dedi Qymbat Irgebaeva.
