Sońǵy bes jylda EAEO elderiniń ózara saýda ainalymy 21 paiyzǵa ósken, dep habarlaidy "Ult aqparat".
Bul týraly Joǵary eýraziialyq ekonomikalyq keńestiń Qurmetti tóraǵasy, Qazaqstannyń Tuńǵysh Prezidenti – Elbasy Nursultan Nazarbaev aitty.
«29 mamyrda Eýraziialyq ekonomikalyq odaq týraly kelisimshartqa bizdiń eldiń astanasynda qol qoiǵanymyzǵa 7 jyl tolady. Búginde birlesip kúsh jumsaýdyń arqasynda EAEO álemniń ekonomikalyq arhitektýrasynan júieli oryn alǵanyn ásireleýsiz aitýǵa bolady. Sońǵy bes jylda elderimizdiń ózara saýdasy 21 paiyzǵa ósip, 2020 jyly 55 mlrd dollarǵa jetti. Bul - daǵdarys jaǵdaiyndaǵy kórsetkish. Áitpese biz odan da úlken jetistikterge jete alamyz», - dedi Elbasy Joǵary Eýraziialyq ekonomikalyq keńestiń otyrysynda.
Nursultan Nazarbaev pandemiia jaǵdaiynda odaq aiasyndaǵy bailanystardyń beriktigi synaqtan ótip jatqanyn eske saldy.
«Koronavirýs pandemiiasymen kelgen ekonomikalyq daǵdarys bizdiń integratsiialyq birlestigimizdiń beriktiginiń synaǵyna ainaldy. Qaýipsizdik máselesi birinshi orynǵa shyǵyp otyr. Bul azyq-túlik, dári-dármek, tsifrlyq jáne qarjylyq infraqurylym siiaqty birneshe salanyń keń aýqymyn qamtidy», - dedi Elbasy.
