Qazaqstannyń Tuńǵysh Prezidenti Nursultan Nazarbaevqa 2011 jyly ota jasalǵan. Bul týraly Elbasy "Shtrihi k portretý" derekti filminiń 5-shi bóliminde aitty, dep habarlaidy Sputnik Qazaqstan.
"Men qazir buryn-sońdy eshkimge aitpaǵan dúnieni bólisemin. Bul sen úshin sensatsiia bolady. Meniń omyrtqama, arqama operatsiia jasaldy. Óte kúrdeli operatsiia", - dedi Nazarbaev suhbat barysynda.
Aitýynsha, onyń densaýlyǵy 2011 jyly 8 naýryzda syr bergen.
"Kontsertte otyrǵan edik. Kontsert aiaqtaldy, ornymnan turdym, aiaǵymdy basa almai qaldym. Kúzetshini shaqyryp, baldaq siiaqty onyń qolynan ustap alyp, kóptiń kózine kórinbei, aqyryndap shyǵar dedim. Zal adamdarǵa lyq toly. Solai shyqtym, dárigerge qaraldym. Sóitsem, problema omyrtqamda eken", - dep eske aldy Tuńǵysh Prezident.
Osydan keiin operatsiia jasap, emdelip shyqqan. Qazir, onyń aitýynsha, barlyǵy jaqsy.
"Naýqas prezident eldi basqara almaidy. Seniń jaǵdaiyń sondai bolsa, oǵan eldiń qatysy qandai, ol zardap shekpeýi kerek. Osylai júrip, adamdarmen kezdesip, 350 kezdesý ótti, túsinesiz be? Mundai densaýlyqpen qalai jalǵastyrasyń. 2011 jyl bolatyn. Sodan keiin taǵy qalpyna keltirýge týra keldi. Aýyr operatsiia boldy. Jaqsy, tájiribeli hirýrg kezdesip, bári aiaqtaldy", - dedi Nazarbaev.
Elbasy otstavkaǵa ketý týraly sheshim qabyldaýǵa osy ota da áser etkenin málimdedi.
"Men bul jaily eshqashan aitqan emespin, meni keshirsin, árine. Qalai aitasyń? Jumys isteý kerek boldy, ketý kerek boldy. Men ketýge daiyn emes edim, óitkeni izbasar máselesi sheshilgen joq. Mine, aqyry sondai sheshim qabyldadym, eki jyldan asa ýaqyt ótti. Durys dep sanaimyn. Ókinbeimin", - dedi Nazarbaev.
Aita keteiik, "Shtrihi k portretý" – Nursultan Nazarbaevtyń ómiri men qyzmetine arnalǵan kóp seriialy derekti film. Film Elbasymen ekskliýzivti suhbatqa negizdelgen. Alǵashqy bólim 1 jeltoqsanda, Qazaqstannyń Tuńǵysh Prezidenti kúni jaryq kórdi. Búginge deiin filmniń tórt bólimi shyqty.
