Aǵymdaǵy jyly bir qatar sheteldik oqýlyqty orys tiline aýdarý qajet. Bul týraly «Jańa gýmanitarlyq bilim. Qazaq tilindegi 100 jańa oqýlyq» jobasy aiasynda qazaq tilinde shyqqan oqýlyqtardyń tanystyrylymynda Elbasy aitty, dep habarlaidy QazAqparat.
«Qansha tildi bilseń, sonshalyqty mádeniettisiń degen sóz bar. Al bul qarapaiym is emes. Keide balalarǵa obal, olar onsyz da táýlik boiy bos emes. Biraq, qazir aiasań keiin ózińe ursatyn bolady. Bizdi, meniń býynymdy oqytqan da joq. Qashan oqytpaq? Ata-analardyń basty mindeti tirshilik etý, ashtan qatpaý boldy. Balalarǵa qaraýǵa qoldary tigen joq, al qazir oqytý kerek», - dedi Elbasy.
Osy rette Memleket basshysy eýropalyq talanatty filosof Shopengaýer ózi ómirbaianynda ákesi berilgen tapsyrmany jattap alýy úshin úsh kún ash ustaǵandyǵyn jazǵanyn mysalǵa keltirdi.
«Dál solai kompozitorlardy da oqytty. Sol kezde olarǵa da unamaǵan shyǵar. Biraq, keiin alǵystaryn bildiredi. Birneshe tildi bilý básekege qabilettilikti arttyryp qana qoimai úlken múmkinshilikter ashady. Búginde bizde myńdaǵan kompaniia jumys isteidi jáne árqaisysy ózine jumysshylar izdeidi. Al til bilmeseń qalai alady?», - dedi Nursultan Nazarbaev.
QR Prezidentiniń atap ótýinshe, birneshe tildi bilý eldegi adami kapital sapasyn jáne onyń ziiatkerlik qýatyn aiqyndaidy.
«Sondyqtan úshtildilik ustanymyn basshylyqqa ala otyryp, balalarymyz úsh tildi bilýi úshin barlyǵyn jasaimyz. Munda turǵan jaman eshteńe de joq. Eger Shveitsariiaǵa barsań, onda taksi júrgizýshisi tórt tildi - aǵylshyn, nemis, frantsýz, italian tilin biledi», - dedi QR Prezidenti.
Osy rette Elbasy aǵymdaǵy jyly birneshe sheteldik oqýlyqty elimizdiń joǵary oqý oryndary úshin orys tiline aýdarý qajettigine nazar aýdardy.
«Bul da mańyzdy. Bizdiń stýdentterimiz álemniń úzdik standarttary boiynsha bilim alý múmkindigine ie bolýy qajet. Atalǵan oqýlyqtardy orys tiline aýdarýda bizde eshqandai problema bolmaidy», - dedi Nursultan Nazarbaev.
Memleket basshysy jariia etken BUU derekterine sáikes, ǵalamshardyń árbir onynshy eresek turǵyny jazý-syzý bilmeidi. Bul shamamen 800 mln adamdy quraidy. Sonymen qatar, mektep jasyndaǵy 270 mln bala bilim ordasynyń tabaldyryǵyn attamaǵan.
