Nursultan Nazarbaev Ázerbaijan Respýblikasynyń Prezidenti Ilham Álievpen kezdesti, dep habarlaidy "Ult aqparat" Elbasynyń baspasóz qyzmetine silteme jasap.
Kezdesý barysynda Elbasy eki el qatynastarynyń damýyndaǵy oń dinamikany atap ótti.
«Bul - meniń Qazaqstannyń Tuńǵysh Prezidenti mártebesinde sizderge alǵash kelýim. Elimizde ekonomikalyq damý baǵdarlamalaryn júzege asyrý jáne táýelsizdikti nyǵaitý jumystary jalǵasýda. Bizdiń qarym-qatynasymyz qarqyndy damyp jatyr. Qazir bizde yntymaqtastyqty keńeitý úshin biraz múmkindik bar. Saýda kólemin arttyrý mańyzdy. Biz tiisti logistikany qurdyq. Erteń Túrki keńesiniń otyrysy ótedi. Men Qurmetti Tóraǵa mártebesin qýana qabyldadym, óitkeni memleketterimizdiń arasyndaǵy yntymaqtastyqty nyǵaitýǵa úles qosýdy jalǵastyra bergim keledi», – dedi Nursultan Nazarbaev.
Óz kezeginde Ilham Áliev Elbasyna Túrki keńesiniń otyrysyna kelgeni úshin alǵys bildirdi jáne onyń ekijaqty qatynastardy nyǵaitýǵa qosqan úlesin atap ótti.
«Qazaqstannyń Tuńǵysh Prezidentin Ázerbaijan jerinde qarsy alý biz úshin zor mártebe. Siz Ázerbaijannyń úlken dosysyz. Kóptegen halyqaralyq máseleler boiynsha árqashan bizdiń elimizdi qoldadyńyz. Sizdiń túrki tildes elder arasyndaǵy yntymaqtastyqty nyǵaitýdaǵy úlesińiz orasan. Mereitoilyq sammittiń Bakýde ótip jatqanyna biz óte qýanyshtymyz», – dedi Ázerbaijan Respýblikasynyń Prezidenti.
Sonymen qatar, Ilham Áliev Qazaqstan astanasynyń salynýy Baký qalasynyń damýyna úlgi bolǵanyn aitty.
«Men Qazaqstan astanasynyń tez ózgergenin baiqadym. EKSPO kórmesin tamashalaǵan kezde qurylystyń aýqymy men sáýlettik sheberligine riza boldym. Qazaqstannyń barlyq jetistikteri Sizdiń atyńyzben bailanysty», – dedi Ázerbaijan Respýblikasynyń Prezidenti.
