Nursultan Nazarbaev Elbasy Ázerbaijan Respýblikasy Milli Májilisiniń tóraǵasy Sagiba Gafarovamen kezdesti, dep habarlaidy "Ult aqparat" Elbasynyń resmi saityna silteme jasap.
Nursultan Nazarbaev Milli Májilis tóraǵasynyń sapary Qazaqstan men Ázerbaijan arasyndaǵy parlamentaralyq qarym-qatynastyń damýyna tyń serpin beretinine senim bildirdi.
– Túrkistanda Túrkitildes elderdiń Parlamenttik assambleiasynyń onynshy mereitoilyq otyrysy aiaqtaldy. Jiynnyń tabysty ótkenine senimdimin. Túrkistan qalasyna 2018 jyly oblys ortalyǵy mártebesi berildi. Sodan bergi ýaqytta qala qurylysynda qandai jetistikke jetkenimizdi ózińiz de kórgen bolarsyz. Biyl qalada Túrki keńesiniń otyrysyn ótkizý josparlanǵan edi, biraq pandemiiaǵa bailanysty jiyn onlain ótti, – dedi Qazaqstannyń Tuńǵysh Prezidenti.
Elbasy uzaq jyldar boiy ekijaqty qatynas ornatý men ony tereńdetý jolynda qyzmet etkenine toqtaldy.
– Meniń marqum Geidar Áliulymen jáne respýblikanyń qazirgi basshysy Ilham Geidarulymen jeke qarym-qatynasym árdaiym joǵary deńgeide. Biz úshin bul dostyqtyń orny bólek, – dedi Nursultan Nazarbaev.
Óz kezeginde Sagiba Gafarova Elbasyǵa qonaqjai peiili úshin alǵys bildirip, Ázerbaijan Prezidenti Ilham Álievtiń izgi lebizin jetkizdi.
– Men bizdiń halyqtardyń arasyndaǵy qarym-qatynas damyp jatqanyna qýanyshtymyn. Bizdi jaqyndastyratyn dúnieler kóp, ol: túrki álemi, dástúrimiz, mádenietimiz. Buǵan Túrkistan qalasyna barǵanda kóz jetkizdim. Qala barshamyzdy tańǵaldyrdy, – dedi Gafarova.
Milli Májilis tóraǵasy Qazaqstannyń elordasynan alǵan áseri týraly da aitty.
– Jańadan qala salý úshin saiasi erik-jiger ǵana emes, Siz siiaqty óz eliniń patriotyna tán úlken júrek te kerek, – dedi Gafarova.
