Is-sharaǵa sondai-aq din, jurtshylyq, diplomatiialyq korpýs jáne buqaralyq aqparat quraldary ókilderi qatysty, dep habarlaidy "Ult aqparat" Elbasynyń baspasóz qyzmetine silteme jasap.
Rásimge jinalǵandar aldynda sóz sóilegen Nursultan Nazarbaev bul oqiǵanyń bas qalamyz ǵana emes, búkil elimiz, barlyq musylman qaýym úshin mańyzdy jańalyq ekenin atap ótti.
– Men memleket basshysy retindegi ókilettigimdi toqtatýdan bir kún buryn, 2019 jylǵy naýryzda osy meshittiń alǵashqy kirpishin qalap edim. Kúlli álemdegidei bizdiń elde de meshitterdiń rýhani jáne áleýmettik máni zor, – dedi Qazaqstannyń Tuńǵysh Prezidenti.
Nursultan Nazarbaev imandylyq úileri igi nietti qaýymnyń basyn biriktirýde, halyqty izgilikke úndep, adami qundylyqtardy nasihattaý isinde zor qyzmet atqaratynyn aitty.
– Búkil Ortalyq Aziia boiynsha úlken, qai jaǵynan da biregei bul meshit tatýlyq pen turaqtylyqqa óz úlesin qosady dep senemin. Jańa meshitte klassikalyq islam sáýlet óneri men dástúrli qazaqi stil sheber úilesim tapqan. Ony jobalaýǵa jáne oidaǵydai júzege asyrýǵa túrli elderdiń maitalman mamandary men sańlaq sarapshylary atsalysty, – dedi Qazaqstannyń Tuńǵysh Prezidenti.
Nursultan Nazarbaev astananyń Bas meshitiniń birqatar erekshelikterine toqtalyp ótti. Máselen, onda Qaǵbanyń asa úlken qabyrǵasynyń úlgisi ornatylyp, oǵan Allanyń 99 esimi jazylǵan, sondai-aq meshit qabyrǵalaryna kalligrafiia stilimen álemdegi eń bir aýqymdy kórkem jazý úlgileri órnektelgen.
– Bir mezgilde 30 myń adamnyń qulshylyq etýine laiyqtalǵan bul ǵalamat qurylys jeke azamattar men investorlardyń qarjysyna salynǵanyn airyqsha atap ótkim keledi. Buǵan memlekettiń bir teńge de qarajaty jumsalǵan joq. Osy saýapty iske atsalysqan azamattardyń bárine zor rizashylyǵymdy bildiremin. Jobany iske asyrǵan «Sembol Constraction» kompaniiasyna, onyń mamandaryna alǵys aitamyn, – dedi Nursultan Nazarbaev.
Islam mádeni ortalyqtarynyń jurtshylyqqa ilim-bilim, tálim men tárbie berýdegi mán-mańyzyna toqtalyp ótken Qazaqstannyń Tuńǵysh Prezidenti jańa meshittiń qala kórkin odan ári arttyratyn týristik ortalyq bolaryna da senim bildirdi.
– Jańa meshit astananyń halqy, qonaqtary kelip demalatyn tartymdy týrizm ortalyǵyna ainalary anyq. Elimizdegi kez kelgen basqa dini ǵimarattar siiaqty bul meshittiń esigi barlyq ulttar men dinder ókilderi úshin ashyq bolmaq. Qazaqstan – qashanda beibitshilik pen jasampazdyqtyń mekeni, – dedi Nursultan Nazarbaev.
Aita keteiik, meshittiń bas kúmbeziniń diametri 62 metr, al biiktigi 83 metr. Meshit munaralarynyń biiktigi 130 metrge jetedi.
Meshittiń jalpy aýdany 68 myń sharshy metrden asady.
Qaǵbanyń aýqymdy qabyrǵasy úlgisin ornatý barysynda 25 mln kristall qoldanylǵan, atalǵan qabyrǵanyń biiktigi 22 metrden asady, al kóldeneńi – 100 metr.
«Haram» atty zalǵa tóselgen kilemniń jalpy aýdany – 16,5 myń sharshy metr, al onyń medalonynyń diametri 70 metr bolady.
Sonymen qatar negizgi zaldyń tóbesinde salmaǵy 20 tonna, diametri 27 metrlik aspaly sham ilýli.
