Qazaqstannyń Tuńǵysh Prezidenti elordada týristik, mádeni jáne áleýmettik jańa nysandar salý josparymen tanysty, dep habarlaidy "Ult aqparat" Elbasy saityna silteme jasap.
Altai Kólginov aýdandar qurylysynyń barysy, qalany kógaldandyrý protsesi jaily, sonymen qatar densaýlyq saqtaý, mektepke deiingi jáne orta bilim berý nysandarynyń, sport ǵimarattary men kommertsiialyq oryndardyń halyqqa qoljetimdiligin qamtamasyz etý úshin qabyldanyp jatqan sharalar týraly egjei-tegjeili baiandady.
Sondai-aq Elbasy nazaryna elordanyń jańa meshiti men EKSPO aýdanyna irgeles aýmaqta júrgiziletin qurylys pen abattandyrý jobalary usynyldy.
– Men úshin bul qalanyń orny bólek. Onyń damý barysyn únemi qadaǵalap otyramyn, bolashaǵy týraly kóp oilanamyn. Alǵashynda jańadan qala salý jobasyna ǵana emes, osy mańaida qalyń orman ósetinine de kúmánmen qaraǵandar bolǵan. Keibir ǵalymdar bul jerge aǵash óspeidi degen edi. Alaida elorda az ýaqyt ishinde ainalasyn «jasyl beldeý» qorshaǵan iri megapoliske ainaldy, – dedi Elbasy.
