Qazaqstannyń Tuńǵysh Prezidenti Nursultan Nazarbaev Qaýipsizdik keńesine joǵary oqý oryndaryndaǵy paraqorlyq máselesin zerdeleýdi tapsyrdy, dep habarlaidy "Ult aqparat".
Nazarbaevtyń aitýynsha, búginde kóptegen ýniversitette stýdentter emtihan tapsyrý úshin para berýge májbúr. Tipti, jataqhanadan oryn bólý kezinde de jastardan aqsha suraityndar bar.
"Bul jastardyń narazylyǵyn týdyrady. Qaýipsizdik keńesiniń tóraǵasy retinde keńeske birlesken toptarmen osy máseleni zerdelep, qaýipsizdik keńesiniń talqylaýyna shyǵarýdy tapsyramyn. Qorytyndysy boiynsha sheshim qabyldaimyz", - dedi Elbasy Nur Otan partiiasy saiasi keńesiniń keńeitilgen otyrysynda.
Ol sybailas jemqorlyqpen kúres jumysyna jastardyń ózi belsene qatysýy kerek ekenin atap ótti.
"Aqshaǵa satyp alynǵan bilimniń ne paidasy bar? Osydan keiin qandai maman iesi shyǵady? Máselen, Nazarbaev ýniversitetin alaiyq. Ol jerdegi stýdentter para degendi atymen bilmeidi. 10 myń jas qazaqstandyq batystyń úzdik joǵary oqý oryndarynda bilim alyp keldi. Solardan surańdarshy, kimge para beripti? Kórdik qoi kezinde, balasyn oqýǵa jibergen kezde, aýyldan artynan soǵym keledi. Túsken kezde taǵy jiberedi. Ai saiyn jiberip otyrady. Áli kúnge deiin bárimiz sonymen júrip kele jatyrmyz", - dedi Elbasy.
Osy oraida Nazarbaev Bilim jáne ǵylym ministri Ashat Aimaǵambetovti ornynan turǵyzyp, keńes berdi.
"Rektorlarmen jumys isteý kerek. On jyldap otyrǵan rektorlar bar. Sen sonyń bárin qara. Qazir biz Qasym-Jomart Kemelulymen kelistik. Endi rektorlardy Prezident taǵaiyndamaidy. Úkimetke júkteledi. Jumys isteitin, jany ashityn, balalarǵa bilim beretin adamdardy qaldyrý kerek. Olai jasamasań, bilim salasynda eshteńe istei almaisyń. Sonda jastardyń da qoldaýy bolady", - dedi Tuńǵysh Prezident.
