Prezident Nursultan Nazarbaev "Jańa gýmanitarlyq bilim. Qazaq tilindegi jańa oqýlyq" jobasy aiasynda shyqqan alǵashqy oqýlyqtardyń tusaýkeserinde aǵylshyn tilin meńgerýdiń mańyzdylyǵyn atap ótti, habarlaidy Sputnik Qazaqstan tilshisi.
Jiynda Jetisý memlekettik ýniversitetiniń shet tilderi men aýdarma kafedrasynyń meńgerýshisi Aiymjan Ryskieva sóz sóilep bolǵan soń, Elbasy aǵylshyn tilin meńgerýdiń mańyzdylyǵyn taǵy da aitty.
"Aiymjan tórt tildi meńgergen. Aǵylshyn tili desek, keibir qazaqtar "Ne kerek bizge aǵylshyn tili, bizge tek qana qazaq tili kerek" dep shýyldaidy. Sonda biz ǵalammen birge qalai júremiz? Ekonomikamyzdy qalai damytamyz? Ǵylym, bilim, mádenietimizdi qalai órkendetemiz? Sondyqtan osyndai qyzdardan bárimiz taǵylym alyp, ásirese jastar umtylýy kerek", — dedi Nazarbaev.
Aita ketsek, Nursultan Nazarbaevtyń "Bolashaqqa baǵdar: Rýhani jańǵyrý" atty baǵdarlamalyq maqalasynyń jariialanǵanyna bir jyl boldy. Osy maqalada prezident álemdegi eń úzdik júz kitapty qazaq tiline aýdarýdy tapsyrǵan edi.
Búginde alǵashqy 18 kitap pen oqý quraly jaryqqa shyǵyp otyr. Oqýlyqtar filosofiia, áleýmettaný, psihologiia, til bilimi, ekonomika, menedjment, dintaný, antropologiia, jýrnalistika baǵyttary boiynsha aýdarylǵan.
Oqýlyqtardyń árqaisysy 10 myń danamen basylyp, aldaǵy bir aida joǵary oqý oryndary men kitaphanalarǵa tegin taratylmaq.
