Qazaqstannyń Tuńǵysh Prezidenti Nursultan Nazarbaev Nur Otan partiiasynyń Májilistegi fraktsiiasynyń jumysyn kúsheitýdi tapsyrdy, dep habarlaidy "Ult aqparat".
Nazarbaev Nur Otan partiiasy áli kúnge deiin eski júiemen jumys istep jatqanyn alǵa tartty. Aitýynsha, nurotandyqtar fraktsiianyń áleýetin tiisti deńgeide baǵalai almai otyr.
"Partiianyń Májilistegi fraktsiiasynyń jumysyn kúsheitý qajet. Bul, negizinen, partiialyq mindetterdi júzege asyrý jáne atqarýshy organdarǵa yqpal etý tetigi. Bul baǵytta jumys nashar júrgizilip jatyr dep aita almaimyn, árine. Bizde "fraktsiia" qaljyń sóz siiaqty. Áli kúnge deiin fraktsiianyń myqty kúsh ekenin túsine almai kele jatyrmyz", - dedi Elbasy partiia saiasi keńesiniń keńeitilgen otyrysynda.
Ol Májilis tóraǵasy Nurlan Nyǵmatýlinge partiianyń tómengi palatadaǵy fraktsiiasyn basqarýdy usyndy.
"Fraktsiia árdaiym jumys istei bilýi tiis. Sonda ǵana bedeli artady. Isimbaeva bastaǵan (Gúlmira Isimbaeva – Nur Otan partiiasynyń májilistegi fraktsiiasynyń basshysy, saiasi keńes múshesi) fraktsiia jaman jumys istep jatqan joq. Dese de, men basqa elderdegi tártipti eskerip, májilistegi fraktsiianyń basshylyǵyna májilis tóraǵasy Nurlan Nyǵmatýlinniń kandidatýrasyn usynamyn. Eger ol qarsy bolmasa, árine. Ol partiianyń jumysyn kúsheitetinine senimdimin. Májilis spikeri retinde fraktsiianyń jumysyn úilestire alady", - dedi Nazarbaev.
Elbasy júieli problemalardy sheshý úshin fraktsiia ortalyq jáne jergilikti jerlerde biýdjet aqshasynyń jumsalýyn qatań baqylaý týraly zańnamalyq bastamany júzege asyrýy tiis ekenin aitty.
Budan bólek, Nazarbaev partiianyń óńirlerdegi filialyn basqaratyn ákimderdiń jumysyn synady.
"Maǵan "ákim men fraktsiia tóraǵasy bir adam bolǵan kezde, tártip bolmaidy" dep aityp jatyr. Ekeýin eki bólek adam basqarý kerek deidi. Men qazaqtyń jaǵdaiyn bilemin ǵoi. Eki qoshqardyń basy bir qazanǵa syimaidy. Oblystarda sosyn tóbeles bastalady. Al eger olai jasamaiyq desek, ákimder, nege jumys istemeisińder? Partiia óz aldyna, meniń jumysym myna jaqta óz aldyna. Eger sondai bolatyn bolsa, partiianyń tóraǵasy emespin dep shyǵyp ket, ornyńdy basqa adamǵa ber", - dep ashýlandy partiia tóraǵasy.
Nazarbaev oblys ákimderin partiianyń jumysyna kóńil bólýge tapsyrdy.
"Partiianyń jumysyna apta saiyn, ai saiyn kóńil bólip, bedelin kóterip otyrýlaryń kerek. Senderdi sailaǵan solar", - dedi ol.
